Tigsik

Tigsik ko an mga magurang sa panahon ngunyan,

Diit-diit na ginagadan kan sa indang mga kaakian.

Ta an kadaklan parasimbag na kun pig-aanggutan,

Kaya an mga magurang nakakamating kamunduan.

Tigsik ko pa ngunyan an ikadaklan sa mga kaakian,

Mantang bakasyon nag-iisip sinda na makatabang.

Sa trabaho sa harong asin mapagdedelihensiyan,

Na makabakal nin mga kagamitan sa eskwelahan

Tigsik ko ngunyan ining mga pulitikong kurapto,

Na saro-saro na sindang rinaramalan, inaaresto.

Tangani na panimbagon sa mga sala na giniribo.

Hustisya para sa mga hinabunan na mga Pilipino.

Tigsik ko nguyan dyan sa maaksyon pang senado,

Sa mga drama, komedya dai nanggad napopondo.

An mga nagmamasid, an mga nagtao nin mandato,

Bangit na sa ginigiribo ta sayang kan pigpapasweldo.

Tigsik ko man ngunyan ining panahon nin tig-init,

Kun mina”brownout” pa hay talagang nakakabangit,

Dagdagan pa kan nagpaparaluya an bulos kan tubig,

Resulta, namamarong na yukyok ta igwa nang anghit