Tigsik

Tigsik ko an mga bulkan sa panahon ngunyan,

Biyo nang nag-aagrutong sa labing kaanggutan.

Makukusog pang linog sa ibang lugar siring man,

Bako daw pagirumdom na ini kan Kagurangnan?

Tigsik ko an pagpuon na kaining klase ngunyan,

Sisribot-sibot na naman orog an mga magurang.

Oroaldaw sa lunadan biyo na naman surusuan,

Pag-arabot sa harong harapay na sa kapagalan.

Tigsik ko ining sarong senadorang makauurag,

Sadiring pamilya man sana pigraraot, pigtitikrag.

Imbes suportahan, surugon an prayoridad dapat,

Daghan kan mga Pilipino biyo nagsusulad-sukad.

Tigsik ko an mga ganid, garo tuko na mga pulitiko,

Bagol na an lalaogon, isinusuka na kan mga tawo.

Ipinipirit an mga sadiri dawa iligal na an mga gibo,

Basta dai mahali sa pwesto, sa pagigin poderoso.

Tigsik ko ining DOH na an gabos pigpapatanidan,

An pagdakol kan mga namok dapat na mapugulan.

Tanganing sa mga dulot kaining helang malikayan.

Ta sayang sana kan mga buhay na nadadanyaran.

Tigsik ko an mga nagtutugdok nin mga edipisyo,

Nakakasayang kun ampaw man sana an pakgibo.

Ta kun minalinog nin makusugon asin minabagyo,

Sigurado mararagba tulos kaya sayang kan sentabo.