Tigsik

Tigsik ko kitang mga tawo sa ibabaw nin kinaban,

Na dai na natatakot sa paggibo nin mga kararatan.

Maabot an panahon, maniningil kan Kagurangnan.

Magbarago na, ngani bako sa kalayo mapaduman.

Tigsik ko kitang pirmi sanang nagsasarig sa Diyos,

Tuninog an isip, mga problema magian nanggayod.

Ta an mahal na Diyos iyo an may kontrol kan gabos,

Kaya may problema o dai magsarig sa Iya nin bulaos.

Tigsik ko ining iba sa mga paraoma ta sa ngunyan,

Na makaheherak man sa indang mga kamugtakan.

May mga titulo kan oma alagad daing natatanuman,

Ano daw solusyon sa mga problemang arog kaiyan?

Tigsik ko pa ining sarong kongresista na mahiguson ,

Udok sa buot na ginigibo an sa iyang mga obligasyon.

Dawa ano pang panraraot kan kalaban an giribuhon.

Pagtabang sa mga nangangaipo dai kayang pugulon.

Tigsik ko an kadaklan sa mga opisyal nin gobyerno,

Sarala na an mga gibo habo pa magharali sa pwesto.

Orog na an ibang yaraon sa kongreso asin sa senado,

Masakit nang makitkit na arog kan kuyumad kan kuto.