Tigsik




Tigsik ko an mga pagirumdom na nagpapadagos

Na gustong ipaabot satuya kan Mahal na Diyos

Sa paagi nin paglinog, baha, bagyo, corona virus

Sa mararaot, magbago na man logod kita gabos


Tigsik ko an mga tataramon nin Diyos satuya

Kun sa mga tugon niya dai kita magpapabaya

Papabuluson niya satuya an dakol na biyaya

Asin dadarahon pa kita sa kahadian nin Ama


Tigsik ko an iba-ibang klasing ugali nin tawo

Lingawan na, mga nagpakulog kan buot nindo

Si mga nagpadangat asin nagpangirit sa indo

Rumdumon si mga leksyon asin adal na naitao


Tigsik ko an ginagawi kan ibang tawo ngunyan

Na kun an sarong tawo mabuot na matinabang

Dakol an nauungis asin pwede ka pa ipagadan

Nin huli sa sobrang kakurisan dangan kaurihan


Tigsik ko man an mga suanoy pang pagtubod

Kun an sadit na aki daa an buol pigsusupsop

Naghahagad na daa nin kasunod na nguhod

Sa tutuo lang, si ama nagpuon nang maglaob