Tigsik

Tigsik ko ining mga nagyayari nang kararatan,

An mga ini pwede pa man kuta na mapugulan.

Kun an mga tataramon nin Diyos pag-aradalan,

Na sa kada pamilya iyo an dapat pagturuhukan.

Tigsik ko ining mga magurang ta sa ngunyan,

Bantayan nin marhay, sa indong mga kaakian.

Aramon kun ano an mga pinagkakaabalahan,

Na konektado sa mga gibong kademonyuhan.

Tigsik ko an mga kaakian na pirmi nasa kwarto,

Na an paghona ta sana dai na sinda nin peligro.

Dai ta aram, konektado na sinda sa mga grupo,

Tunay, bako nang maka-Diyos an mga ginigiribo.

Tigsik ko pa an mga nagyayari ngunyan sa kaakian,

Dai ipagbasol sa social media an mga nanunudan.

Na sa hoben na edad nakakagibo na nin kabuahan,

Ta an marhay na ugali dapat matangad sa magurang.

Tigsik ko ining mga buaya na yaon sa gobyerno ta,

Saro-saro nang renaramalan, inaaresto na sinda.

Sa mga maarabot na aldaw igwang masurunod pa,

Tanganing an mga Pilipino matawan na nin hustisya.