Tigsik

Tigsik ko ining sarong relihiyosong grupo,

Na nagsorpresa paghiwahiwa sa tinampo.

Matrapik ta binaragatan an mga tinampo,

Si dai nin mga kasalan naperwisyong tutuo.

Tigsik ko ining mga agit-agitan na mga kulto,

Lalabanan daa ninda mga pulitikong kurapto.

Sinda baga an nag-endorso sa mga myembro,

Ngunyan na baradat na saka pa marereklamo.

Tigsik ko ining isyu sa nasyon ta na deborsyo,

Dai iyan pigtutugutan, orog kan mga Katoliko.

Dawa pa pig-aabuso na mga esposa, esposo,

An mga aki iyo an napeperwisyo asin apektado.

Tigsik ko man mga naaaksidente sa tinampo,

Ibang tsuper nakikipagkarera sa mga behikulo,

Haros pa sana palayugon na garong eroplano,

Kaya nasasayang an buhay kan mga pasahero.

Tigsik ko an kamugtakan kan panahon ngunyan,

Sa tahaw nin tig-init igwang bagyo sa ibang lugar.

May mga paglinog, golping buhay nadadanyaran.

Logod magbakli na an mga tawo sa mga kasalan.