Tigsik

Tigsik ko an mga tawo na nakaturuhok sa senado,

Kun saen an haloy na impeachment trial ginigibo.

Maubos an oras, pagdiskusyon kan mga abogado,

Tangani laygayon, dai maconvict, sa indang amo.

Tigsik ko an mga kahimanawa tang mga Pilipino,

Logod mamuklat an mga mata kun ano an tutuo.

Na dawa anong depensa kun may sala na ginibo,

Madadaog, dawa anong urag kan mga abogado,

Tigsik ko an magayon sanang buhok na abogado,

Na an ipigdedepensa sarong opisyal nin gobyerno.

Dai pwede kasohan ta 32 milyones kono nagboto,

Grabe na an kasalan dai sana palan makakastigo?

Tigsik ko, nagkakapirang probinsiya sa Bikolandia,

Na natawanan, mga bagong unit nin ambulancia.

Logod dai paggaramiton sa pagsaod asin sa iba pa,

Ta para sa mga pasyente, nasa emerhensiya sana.

Tigsik ko kun an mga kalalakihan naggugururang na,

Golpi nang makukulog, namamati sa hawak ninda.

An pag-ihi putul-putol na, asin ta diit-diit na talaga,

Sarong senyales na an prostate igwa na dipirensiya.