Tigsik

Tigsik ko ining buhay ta digdi sa kinaban,

Kun sagkod noarin kita dai ta naaaraman.

Kaya dapat preparado kun kita babawian,

Kan buhay na sa Diyos sinublian sana man.

Tigsik ko ining garo cancer sa sosyodad ta,

Ini baga na haloy nang problema sa droga.

Si mga ugat kaini biyong naglalangkaba na,

Ta an nararamalan si mga sanga man sana.

Tigsik ko an buhay kan iba sa mga pulitiko,

Na namumugtak nang pirmi sa mga piligro.

Pirmi na may huma sa buhay kan mga iniho.

Hali sa mga kalaban asin dai mga kaalyado.

Tigsik ko an mga hobenes na mga agresibo,

Pighiling sana kun gwapo nag-init na an payo.

Kaya pagluwas nin harong kontodo armado,

An resulta pweding may atubangon na kaso.

Tigsik ko ining mga eksena diyan sa senado,

Bilog na kinaban nakaturuhok, tensyonado.

Kun ano an magigin hatol sa sarong akusado,

Na ikamumundo o ikaoogma nin mga Pilipino.