Tigsik

Tigsik ko an mga nangyayari sa kapalibutan,

Grabeng takot asin kahaditan namamatean.

Kan namamanwaan sa mga krimen, kararatan,

Sa pwede mangyari sa mga kamot nin kriminal.

Tigsik ko an bulan nin PWD ngunyan na bulan,

May deperensiya sa hawak, ayuda dadagdagan.

An mga kaakian na nagpapatherapy siring man,

Orog tinatawan atensyon, mga may kakundian.

Tigsik ko, mga ipigtatao kan gobyerno na ayuda,

Kadakol na namamanwaan, napapasipara sana.

Ta kun dai mo kaalyado, kapamilya an tagalista,

Siguradong pag-abot kan mehoras dai ka kaiba.

Tigsik ko an iba sa myembro kaining kongreso,

Dawa nasa bakasyon padagos an pagtrabaho,

Sige an libot-libot sa nasasakupan na distrito,

Na masiguro, tultol an patrabaho mga proyekto.

Tigsik ko ining makulog na katotoohan sa buhay,

Kaidto, haros dai magkakan ta tioson na marhay.

Ngunyan, may pambakal na nagtitios pa giraray,

Ta sa mga senyor, ibang kakanon bawal na tunay.