Tigsik

Tigsik ko an mga nagyayari sa sa tuyang kinaban,

Sa mga linog, pagbabaha, pagtuga pa kan bulkan,

Asin iba pang mga kalamidad dai nang katapusan,

Magbarakli na ta an Diyos grabe na an kaanggutan.

Tigsik ko an mga magurang sa panahon ta ngunyan,

Na sige an reklamo manungod sa sa indang kaakian.

Nin huli sa celfon dai na lamang napapakinabangan,

Kiisay sala kaya ta sinda nindo pigbarakalan kaiyan.

Tigsik ko ining SONA 2026 kan sa tuyang presidente,

Mga naginibuhan, gigibuhon pa ipigpresentar kaini.

Dakol an nagkaurogma pero may ibang urag pirmi,

Kaya ngani nagkaigwa na naman nin mga pagrarali.

Tigsik ko an ibang opisina nin sa tuyang gobyerno,

An pag-ekonomiya sa kuryente talagang todo-todo.

Dawa pa nang-isnit na an aircon ninda pinopondo,

Kaya may beses igwang empleyadong nadidismayo

Tigsik ko, ibang boarding house nin mga estudyante,

Na an mga pasilidad na ipinauutob kulang na pirmi.

Kaya kun igwa nin kasulo, mga aberiya na nagyayari,

Dai nakakasalbar, nasasayang an buhay kan mga ini.