Tigsik

Tigsik ko an mga bayolenting nanyayari,

Sa eskwelahan, gibo nin mga estudyante.

Siisay dapat basulon sa mga siring kaini?

Kamong mga magurang ano an masasabi?

Tigsik ko an mga aki sa panahon na iniho,

Na linalaog na nin demonyo an mga payo.

Nin huli sa mga games ngunyan na nauuso,

Ta an mga magurang dai na nagmamangno.

Tigsik ko pa an dapat na bantayan nanggad,

An mga magurang ngunyan dapat marigmat.

Sa mga kaakian na myembro ni praternidad,

Bantayan, na dai na umabot sa pagkahutad.

Tigsik ko, mga namamanwaan o siisay man,

Daing datang ugali kan kaakian sa ngunyan,

Dai ipagbasol sa mga titser kan eskwelahan,

Sa gabos na oras siisay baga pirmi kaibahan?

Tigsik ko man an sa eskwelahan na gwardya,

Bago pa maglaog sa gate ining mga eskwela.

Rekisahon kun may mga armas na dara-dara,

Mga armas man kan magurang dai ibarag sana.