Tigsik

Tigsik an mga tawo na nalilingaw nang gayo,

Magpangadyi, magsamba sa Diyos na tutuo.

Ta nagtutubod na bakong tutuo an impiyerno,

Logod mapagmata na asin magbakli na kamo.

Tigsik ko man an saro sa mga ipigsusuhistion,

Na an facebook daa dapat na talagang halion,

Ta nagigin ugat na nin mga bayulenting aksyon,

Orog sa mga kaakian na bangkag na sa celfon.

Tigsik ko an iba sa mga may “feeding program”

Na dai man tultol, pakaluto kan mga pagkakan.

Minsan malagtok an maluto, panira daing siram,

Bakong kaakian an basog kundi mga magurang.

Tigsik ko an barangay eleksyon dai daa dagos,

Kaya an poder kan mga opisyales mapadagos.

Sagkod na an pondo sa barangay dai nauubos,

Orog ta an kadaklan man sa inda abang hihigos.

Tigsik ko an mga hayop sa harong na inaataman,

Na pinoprotektahan ta asin ta sinda pinapakakan.

An masakit ta kun dai man tinutuyo nadidingkilan,

Nakukulugan kita sa ineksyon asin nagagastusan.