Tigsik

Tigsik ko an pagselebrar kaining kapiyestahan,

Sarong pag-iidolo, pagsamba sa diyusdiyusan.

Sabi sa Biblia an dapat sambahon an Kaglalang,

Kaya nungka tang sambahon ining mga nilalang.

Tigsik ko mga kalamidad, trahedya na padagos,

Anggot na, pigpapakol kita kan Mahal na Diyos

Siya an nagtatao sa tuya kan kaipuhan ta gabos,

Alagad mga rebulto, hinahadukan, pighahapros

Tigsik ko pa ining mga bagyong maabot ngapit,

Sa mga kahimanwa dagdag naman na pasakit.

Orog sa harababang lugar na dai na nadadakit,

Nin huli sa tubig baha may mga daga nagtitiris.

Tigsik ko kun may pigseselebrar na mga piyesta,

An ngisi kan mga mandurukot abot na sa talinga,

Ta mga bulsa kan mga deboto sigurado na ninda,

Kaya minapuli an iba na baralik, ralaslas an bulsa.

Tigsik ko an panahon na dawa nag-uran-uran na,

Alagad an alingahot, an harasahas nag-oorog pa,

Mahal na presyo kan kuryente nakakahayblad na,

Logod sa masunod na bill dai man atakihon kita.