Tigsik

Tigsik ko an mga deboto na sagkod ngunyan buta,

Sa katotohanan dai pa giraray sinda napapagmata.

Na an pag-aaleluya sa mga rebulto kasalan talaga,

Kaya orog ikinaaanggot kan Diyos na Kaglalang ta.

Tigsik ko man an mga tawo na an mga isip kipot,

Orog kun pag-abot sa problema sa pagkamuot.

Kun dai nakakayanan kan may maluluyang buot,

Imbes magdulok sa Diyos, naiisipan manghugot.

Tigsik ko, sarong opisyal nin gobyerno na maisog,

Nin huli ta poderoso, paggibo nin sala dai natakot

Alagad kan maaresto an mga mata biyo nagbirilog,

Ta tibaad daa sa languban igwa na sa iya magtigok.

Tigsik ko, mga pasaway na opisyal nin gobyerno,

Na mamahalon an mga auto, yate, asin eroplano.

Alagad kun nabibisto na kaya sinda na naaaresto.

Sa wheel chair na, naka oxygen sa ospital diretso.

Tigsik ko pa ining dengue na delikado nin marhay ,

Dara kan mga namok na perwisyo man nin tunay.

Maglinig sa kapalibutan tangani na kita makalikay,

Na madanyaran kaini ta sayang kan satong buhay.