Tigsik

Tigsik ko an mga dai nagtutubod sa impyerno,

Kaya nagpapadagos sa mararaot na mga gibo.

Logod magbarago na, magbarakli na nin tutuo,

Ta sigurado, ilalandag an kalag nindo sa kalayo.

Tigsik ko, mga pulitikong grabe kapoderoso,

Na nag-iiriwal pirmi sa manlaen-laen na isyu,

An dapat kuta na magkasararo na man kamo,

Isipon, karahayan kan mga nagluklok sa indo.

Tigsik ko an mga delikado asin pesting namok,

Talagang peligroso kun an mga ini makatudok.

Tangani daing namok malinig pirmi an palibot,

Na an buhay nyato dai sa kagadanan umabot.

Tigsik ko pa an iba sa mga tsuper na tarantado,

Na nagmamaneho, garo kagsadiri kan tinampo.

An mga behikulo haros gibuhon nang eroplano,

Sayang an buhay kan sa indang nadediskwedo.

Tigsik ko man an ibang manugang sa ngunyan,

Na mabuot asin magalang sa mga panugangan.

Pigtatrato sinda arog sa sadiring mga magurang,

Umawon sinda asin dapat man na pangarugan.