Tigsik

Tigsik ko an Kaglalang sa kinaban kan gabos,

Ini iyo an tutuo asin an buhay nyatong Diyos.

Kaya kun may mga problema o kita nagtitios,

Bako sa mga rebulto maghadok, maghapros.

Tigsik ko an pagkamuot na hanap asin tutuo,

Dai pagbasehan an hitsura, kun bulsa paldo.

Kundi mga ugali na igwa kun baga makatawo,

Dangan kun maka-Diyos, mga gawi, ginigibo.

Tigsik ko man an iba sa mga magurang baga,

Na makuris sa sadiring aki man sana ninda.

Pagkatapos imundag pinabayaan na talaga,

Habo nin responsabilidad,gusto siram sana.

Tigsik ko, mga nangyayari sa mga eskwelahan,

Mga pangsusugot iyo an kadaklan na dahilan.

Kaya dapat talaga panimbagon an magurang,

Ta dai nadidisiplina an sa indang mga kaakian.

Tigsik ko an ipig-uktaba na Barangay eleksyon,

Nasayang sana si mga pakiabrasa, pakihuyom.

Kan mga makandidatong gusto makaposisyon.

Si mga nakapwesto matiner haloy pang panahon.