Tigsik

Tigsik ko an super el nino na pigpeprepararann,

An mga bagay na iyan dai dapat na pagtakutan.

Ta an Mahal na Diyos dai man kita pababayaan,

Kaya sa tubig na kaipo dai man kita mauubusan.

Tigsik ko an mga proyekto kan satong gobyerno,

Kun minapalpak o malasado an pagkatrabaho.

Mga kontratista daa iyong dapat basulon nindo,

Ta pinagkanigo na sana an tinapyasan na pondo.

Tigsik ko an iba sa mga opisyales nin gobyerno,

Kun minapalpak an mga patrabaho sa proyekto.

Nanghuhugas na sana nin kamot an mga iniho,

Obligasyon man ngani ninda an pagmato-mato.

Tigsik ko man an iba sa mga kaakian ngunyan,

Na daing pagkamuot, paggalang sa magurang.

Maabot an panahon pagbabasulan ninda iyan,

Ta an mga magurang importante sakod pa man.

tigsik ko, mga halipot na drama sa social media

Na nakakauyan na dalanon orog kan mga aki ta

An mga panugangan inaapi nin manugang sana,

Nakakahadit an mga siring, makaimpluwensiya.