Tigsik

Tigsik ko ining pigpepreparan na super el nino.

Alagad may mga lugar na mauran, pigbabagyo.

Kaya dai sana magparaharadit kitang mga tawo,

Ta an Mahal na Diyos iyo na an tatao, may plano.

Tigsik ko ining problema sa gurubot na trapiko,

An suhestyon, dai na magbarakal nin behikulo.

Ipabarakal na, mga lulunadan na pampribado,

Magrulunad na sana sa behikulong pampubliko.

Tigsik ko an mga pinahiwas nang mga tinampo,

Alagad pano na nin nakaparadang mga behikulo.

Na orog pang nakadagdag sa gurubot na trapiko,

Dapat kuta na sa mga ini may nagmamato-mato.

Tigsik ko an sa tutuo sana an tunay na problema,

An mga aroganting tsuper ta dai nin mga disiplina,

Siring man an mga nakakaulang sa mga bangketa.

Imbes, an mga tawo nagraralakaw sa tinampo na.

Tigsik ko an buhay ta ngunyan na abaa nang sakit,

An iba sa mga kahimanwa ta nabubuhay nin pirit.

Sa sobrang problema igwang nakakapay, natuturik ,

Kaya may nakakagibo nin krimen ta raot na an isip.