Tigsik

Tigsik ko ining mga prediksyon sa ibang nasyon,

Mangyayari daa an pirang aldaw na pagdiklom.

Kaya an mga tawo pipagpreparar, mga kakanon,

Dai dapat mahadit, sa Diyos sana kita maglaom.

Tigsik ko, mga nagyayaring aksidente sa tinampo,

Dahil sa kapasloan kan ibang tsuper sa pasahero.

Paranu-pano na, sa mga bagahe talagang kargado,

Saka na nagkakasiribot kun igwa na nadidiskwedo.

Tigsik ko ining dapat tungkusan nin mga kaakian,

Mantang buruhay pa mahalon an mga magurang,

Na kun garadan na saka mataong burak, hihiribian

Narutos sa gutom, kan magadan may ponsyonan.

Tigsik ko man kitang mga senyor na, gururang na,

Sa pagbalyo sa tinampo magmaan pa giraray kita.

Ta kun arogante an tsuper kita sa tamang linya pa,

Kun mahagop kita nagadan, paano na an buhay ta?

Tigsik ko an ibang mga tsuper na dai nin pakimano,

Kun magmaneho nin behikulo garo na sa eroplano,

Dai labot kun may gurang, estudyante nagbabalyo,

Dawa sala sinda anggot pa kun may nagrereklamo.