Tigsik

Tigsik ko ining realidad sa buhay pulitika

An kadaklan birik-birik an tambod talaga

Kalaban ngunyan sa aga magkaalyado na

Kun saen may delihensiya duman minaiba

Tigsik ko an mga dating takot sa bakuna

Alagad ngunyan dawa halabaon an pila

Nakikipag-inutan, nakikisusuan pa sinda

Ta tibaad sa mga benipisyo mawaran pa

Tigsik ko ining mga tawong hugakunon

Sa pagparahinugak inuubos an panahon

Iyo pang maurag kumakan, pirmi gutom

Sa paggibo nin aki sana pirmi mahiguson

Tigsik ko, mga dai pagbilangon nanggayod

Mga puting buhok, kublit na biyong kururot

Grabing problema, mga kakulugan nin buot

Dapat bilangon an mga grasyang nag-aabot

Tigsik ko man kun igwa baga nin karasalan

An ibang mga bisita makaurag kun minsan

Mga dai man imbitado iyo pang mantatatsar

Si kinasal gutom basta mga bisita makakakan