TINAGA NIN PASAWAY: Pulis na naputolan kamot nagguno nin comendacion

Ni Sonny Malate

SAN JOSE PARTIDO --- Pinalayogan nin pag-umaw asin pag- apreciar sa pinahiling na pambihirang coraje asin  dedikasyon sa sinumpaan na katungdan si PSSg Nilo M. Miraña kan San Jose Municipal Police Station (SJMPS) sa pamamayo ni PMAJ Glenn M. Locquias.

An PNP National Headquarter,  National Police Commission (NAPOLCOM) PNP Bicol, PNP Provincial Headquarter, LGU San Jose,  multi-sectoral group asin mga  netizen  sa social media sararo sa pagtao nin comendacion ki Miraña asin pag- iriba bilang mga oragon na miembros kan pulisia 

Si Miraña asin pag-iribang miembros kan SJMPS an nagresponde kan Agisto 22 sa pangapodan nin agap kan sarong residente kan Barangay Callalahan digdi. An ginibong pagresponde nagresulta sa madugong confrontation kun saen naputol an kamot kan Team Leader na si Miraña.

Sa initial na imbestigasyon na pigconducir dapit sa incidente,  soboot pigsaway kan grupo ni Miraña,  an suspetsadong individual na pigtutubodan  may deperensya sa pag-iisip, na biyong nangingisog sa saiyang kapamilya huli sa paglinig sa laguerta kan saindang residencia.

Soboot pigprobaran na pakalmahon ni Miraña an suspetsado alagad dae ini nag-ontok. Imbis, dinaguso kaini nin wasiwas nin sundang an biktima na nagresulta sa  tama sa walang kamot asin lalawgon kan pulis.

Tanganing dae na makagibo pa nin dagdag na danyos sa hawak o buhay kan presenteng apat na mga pulis, an suspetsado pinatamaan nin badil sa ibabang parte kan hawak.  

An duwa parehong ikinutipas sa Bicol Medical Center para sa atencion medical. Sa Facebook post kan kapamilya ni Miraña kan Agosto 23 maogmang pigpahayag digdi na matrayumpong naikabit an suminuhay na kamot sa hawak ni Miraña. .

Katakod kaini,  nagin marikas an pag-extendir nin asistencia financial ni Alkalde Jerold B. Peña sa pamilya ni Miraña. Pigbuyagyag man ni Peña na saiyang iiinitiar an ipapasairaron  sa tamang psychiatric intervention an tuminigbas sa pulis asin sasangatan nin caso kun kinakaipohan.

Segun pa sa Alkalde, may proponedo siyang  House Bill para sa mas malinaw, makatawo asin legal na mekanismo kan gobyerno sa pagsimbag sa caso nin mental health crisis. Ini significante sa tahaw kan mamundo asin makangirhat na incidente sa mismong banwaan niya.

Mientrastanto, nag-asegurar si Police General Jose Melencio C. Nartatez, Jr. kan PNP na bilog an suporta kan ahencia ki Miraña na magguno niya an mga asistencia asin  beneficio na maninigo sa saiya asin pamilya. 

Pigreconucir asin orgulyo niya pa man an coraje, dedikasyon asin determinasyon sa pagpautob kan grupo ni Miraña sa policiang "talk first, de-escalate when possible" sa pagsimbag kan incidente sa barangay sa San Jose Partido. 

Pigtawan doon kan Police General na sustenido kan PNP an sistemang "Bagong PNP para sa Bagong Pilipinas, Serbisyong Mabilis, Tapat at Nararamdaman". Huli kaini, an ahencia higot an pagtangkuros sa propesyonalismo asin dedikasyon sa sinumpaan na katubgdan sa comunidad.