Tinambac – Siruma, duwa nang distrito kan Casureco 2

Inabot nin duwang taon sa lamesa kan National Electrification Administration (NEA) an resolusyon na inaprubaran sa Annual General Membership Assembly (AGMA) kan Camarines Sur II Electric Cooperative (Casureco II) kan Deciembre 12, 2020 na bangaon sa duwang distrito an Tinambac- Siruma District alagad inaaprubaran pa sana kan ahencia kan Hunyo 7, 2022.


Sa pinaluwas na memorandum kan NEA na pirmado ninda Administrator Emmanuel Juaneza, Deputy Administrator Legal service Officer; Nollie Alamillo, Acting Deputy Administrator; asin Percival Crisostomo, Acting Department Manager, saindang inaprubaran an ‘‘ratified resolution’’ kan AGMA nganing iimplementar na alagad dai paman nagtalaan kun nuarin mapaapod nin district elections para sa director kan Siruma asin Tinambac.


An AGMA resolution No. 2020-1 serye 2020 naprubaran kan panahon pa ni board president John Paul Sta.


Sinabi ni Rinner Bucay, opisyal na parataram kan Casureco II sainda palang narerecibe an inaprubaran kan NEA para sa ‘‘redistricting’’ kan Siruma-Tinambac sa district 10 asin 11.


An district 10 iyo an Siruma igwang rehistradong 2,562 na aktibong miembros-consumedores mantang an Tinambac iyo na an district 11 igwang 9,081 miembros-consumedores asin an listahan na ini base sa record Hunyo 2022. Dai kabale sa bilang iyo si mga naputolan nin serbisyo nin electricidad huli kan mga morosidad na dai nababayadan sa cooperativa.


An pagsuhay sa duwang distrito haloy nang kahurotan kan LGUs sa pagtubod na mas magiging epektibo an serbisyo kan cooperativa sa miembros-consumedores nganing an direktor nakatutok sana sa saindang sakop na distrito.


Sa ngunian an mga distrito kan Casureco II kinababalehan kan Naga North, Naga South, Calabanga, Bombon, Magarao, Canaman, Pili, Minalabac, asin Milaor. (DPAureus)