TINGATING

Tigsik ko ining bulan na Enero

Sa paglaog kan taon ini an primero

Kadakol mga pangako ginigibo

Dae man nauutob sadiri lang pigloloko!

Namundag sa Febrero tigsik ko man

An sabi kan iba kulangkulang

An sabihon sa sainda saimong probaran

Sige na po kun gusto mong mabakdolan!

Tigsik ko an Marso saka Abril na bulan

Panahon kan tag-nit ini an kapinonan

Ika mababadtrip  magbanggi, mag-aldaw

Anghit sa yokyok pati singit minaalisngaw!

Bulan na Mayo tigsik ko pa man

Pano nin ogma, panahon nin fiestahan

Sagana an tsibug, pahapon an walwalan

Pag-uli sa harong may bitbit pang himuloan!

Tigsik ko man ining bulan na Junio

Panahon na grabe an gologolo

Panahon na minalaog sa matrimonio

Kada banggi pirming juego limpio!

Tigsik ko an bulan na Hulyo saka Agusto

Tingating daa sabi kan mga tawo

Aw ini mananggad po totoo

Sa mga burikaton saka mortogo!