Tinulang manok sa quarantine facility pawalat ni Bong Nasol

Nakaluto pa nin tinulang manok si Salvador ‘‘Bong’’ Nasol, 60, sekretaryo kan Office of the Mayor kan LGU Pamplona, CamSur para sa mga residentes kan barangay na yaon sa quarantine facility asin destinong nurses asin iba pang personajes kan Covid-19 facility antes pinagbabadil gadan an biktima kan Sabado, Mayo 29 kan riding-in-tandem sa saiyang residencia sa brgy. Tambo.

Napaluha si mga pinaglutoan na masiram na tinula sa Brgy Kagbibi quarantine facility kan maaraman an insidente na hale pa lang sa saindang isolation center mientras na naghahalat kan pagtapos ninda sa catorce diyas sa cuarantina na estrictong pinapasunod kan local IATF.

Saro sa pasyente sa laog kan cuarintina, barangay kagawad iyo an nakiulay na kaipuhan ibang menu naman an saindang panira dapat tinulang manok asin ini nasunod alagad ini na palan an ultimo nindang paghihirilingan.

Si Salvador na midbid sa apod na ‘‘Bong’’ dating may restaurant sa Pamplona asin tataong magkusinero kaya iyo an pinakiulayan na maglutong tinula.

Nanghihinayang an mga job order na empleados kan LGU Pamplona huli ta madaling dulokon si Bong orog na kun finansyal an problema. Siya an dinudulok na utangan kan JOs kun naabala an pag-abot kan saindang sueldo.

Sa trabajo sa opisina, sinabi ni Alcalde Ronaldo ‘‘Boy’’ Franco namumundo siya huli ta si Bong marhay sa trabajo dawa na ngani aldaw nin Sabado asin Domingo maging sobra na sa office hours dai nagcucuentada kan oras.

Sa Municipal Police Station, sinabi ni Police Captain Antonio Per, jefe de pulisya na nagpapadagos pa an saindang imbestigasyon matapos makakua sinda kan CCTV Camera kan magdulag an mga suspechadong riding-in-tandem.

Sa inisyal na imbestigasyon an responsable sa krimen nagsusunod sa van na kun saen nakalunad an biktima hale sa Kagbibi quarantine facility sagcod na pigsunod sa saiyang residencia sa barangay Tambo, Pamplona sagcod na pinagbabadil gadan nin calibre 45. (DPAureus)