Tiunay Sa Daghan

Tigsik ko an gibong karamangan

Aw maconsuelo baga, ano ba yan

May nagsaginsagin pakipot pa man

Paipit rinibo, tapos an kauragan!

Tigsik ko an paipit kan pirilian

Wagas an alimpasay ni May Caday

An kaogmahan biyong nagsusupay

Nakabayad sa lending, nakaparebond!

Tigsik ko an nagbanca sa duwang salog

Maurag magsaginsagin, magpacute

Ibong-ibong an kabig, daeng supog

Bulsa omok-omok, birikbirik an tambod!

Tigsik ko an sa election talunan

Makulog sa puson, simpil sa daghan

Naghihigop sabaw, tinangadan

Pait sa dila, haldat sa halanuhan!

Tigsik ko an paglaog sa politica

Kun hababaw an saimong bulsa

Aw, Nonoy an paglaog digdi hare na

Kun ika dirutado, ika nganga!

Tigsik ko an uminaging pirilian

Iwinalat tiunay sa daghan

Natapos na lamang an birilangan

Pamilya, dae pa nagtitirinohan!