Tolo gadan sa magkasuhay na drug operations sa Naga

Tolong mga suspechadong dorogista gabos gadan sa magkasuhay na drug operations sa Ciudad nin Naga kan mga awtoridad matapos magprubar na maglaban sa operasyon kan Regional Drug Enforcement Group kan Febrero 1 hasta 2.

Si Police M/Sgt. Tobias Bongon, opisyal na parataram kan Naga City Police Office (NCPO) nagpahayag na sa magkasuhay na buy-bust operation enot piglansar kan Febrero 1, 2023 mga alas 10:45 nin banggui asin an suspechado pigmidmid na si Angelo Fernandez y Galvez, soltero asin residente kan Zona 4, St. Claire, Concepcion Pequeña, Ciudad nin Naga.

Si Fernandez, kan inaarestar kan mga awtoridad nagsayuma sagcod na nagbunot kan calibre 45 asin pigpuntirya an badil sa mga awtoridad sagcod na digdi na nagpaputok nin armas asin tinamaan sa hawak an biktima na tolos binawian nin buhay.

Maabot sa P340 ,000 an nakumfiscar na shabu asin an saiyang armas na calibre 45.

Si ika duwang operasyon piglansar kan PDEG asin iba pang grupo nin PNP sa Barangay San Isidro, Ciudad nin Naga kan mga bandang alas 11:00 nin banggui kan Febrero 2, 2023 alagad an duwang mga suspechado na sinda Albert Gumba, nag-AWOL na pulis asin Rey Del Minguez, mga taga Bula, Camarines Sur parejong nagprobar na magtumang asin nagbunot nin calibre 45, dai man nagpahuri an kapupulisan binadil an mga biktima na anas binawian nin buhay.

Nakumfiscar sa duwang suspechado iyo an duwang calibre 45 asin shabu na nagcacantidad nin P47,000.

An drug operations piglansar kan pinagsarong fuersa kan operation team kan ODRDO, RPDEU5, CPDEU, PS2, CMFC, RID-RSOU5, PDEG-SOU5 asin 501st RMFN5.

Mientras tanto, si PBEN Rudolph Dimas, regional director kan Bicol PNP nangapudan sa mga drug personalities na mas marhay pang magsuko sa awtoridad para sa saindang safety envez na magtumang. (dpa)