Tolo magraralaban sa cargong alcalde sa Naga
Ini an mangyayari sa ralaban sa politica sa Ciudad nin Naga sa maabot na eleksyon lokal sa Mayo 9, 2022 na kinababalehan ninda incumbent Mayor Nelson Legacion, dating Alcalde John Bongat asin an negosyanteng Fortunato ‘’Tato’’ Mendoza.
Si Bongat na saiyang ka-tandem bilang bise alcalde si dating Juez Zenny Bragais asin kumpleto an saiyang sampolong mga candidatong consejal iyo an pinaka-enot na nagsangat kan saindang certifico de candidatura sa Comelec kan Oktubre 1.
Sinda independienteng candidato sa lindong kan Coalition for Good Governance (CGG) ‘’Yes Team’’.
An tandem ninda incumbent mayor Legacion asin vice mayor Nene de Asis parejong kan partido liberal asin Tato Mendoza - Tots De Quiros tandem, independiente asin inapod an saindang grupo na Tatoots Team piglalaoman na parejong maplantiar sinda kan COC sa Oktubre 7.
Ngunian sana mangyayari na an mga candidato kan LP na mga incumbent officials mayong ma-endorso sa nakakalangkaw na opisyal kan partido.
Si Bise Presidente Leni Robredo iyo an saindang piglalaoman bilang lider kan saindang partido political alagad dai mangyayari envez sona libre an laban kan Team Naga asin Coalition for Good Governance.
Si Legacion asin Bongat parejong nasa LP alagad huli ta mga incumbent an grupo ni Legacion iyo an dapat eendorso alagad an bise presidente pinabuelo na an laban kan TN asin CGG.
Sinabi ni bise alcalde De Asis na disbentaje sa saindang mga incumbent kun dai na nag-endorsar si VP Robredo, alagad ipapaheling nalang ninda sa electorado an mga acomplisimiento sa laog nin tolong taon.
MGA CANDIDATONG CONSEJAL
An mga candidatong consejal kan TN kinababalehan kan mga incumbent na si Sonny Rañola, Lito Del Rosario, Ghiel Rosales, Vidal Castillo, Salvador del Castillo, Jose Perez asin cierto nang makakalaog sa magic ten Consejal Jess Albeus alagad sagcod sa sinurat an baretang ine hinahalat nalang an kumfirmasyon ninda Liga President Dodith Beltran asin Gel Abonal Gomez.
Sa Yes Team na mga candidatong consejal sinda, Junjie Abella, Jhessa Ador, Gil Belen, Joco Celebrado, Khian James, Areiz Macaraig, Gemma Moso, Lorenzo Narvaez, Papa Mico Pielado, asin Ambet Portillo.
Sa Tatoots Team an mga candidatong consejal sinda, Gina Albao, Ed Gregorio, Allan San Juan, Mario Salak, Solomon Sales, Nathan Sergio, Arturo Tuy, Mon Baturiano, Sim Adan Jr, asin Toto Diokno. (dpa)