Tolong dating alkalde mabalik sa puwesto

Ni Sonny Malate

Tolong dating  alkalde sa Partido Area an mabuwelta sa puwestong saindang  pig-ocupar kan mga nakaaging taon huli sa saindang trayumpo kan nagtalikod na midterm elections.  Ini iyo sinda  Raquel S. Lim  (NUP Goa), Jimmy Deleña (PFP Presentacion) asin Nelson Bueza  (PFP Garchitorena).

Riribayan ni Deleña bilang alkalde iyo an saiyang esposang si Alice na nakasaro sanang turno. An lalaking Deleña an halawig na taon na nagin  local na ehecutivo asin liwat na mabalik sa puwesto para sa panibagong termino.

Maroromdoman na kan mga nakaaging taon, an aki kan mag-agom na Deleña, si Joey, an nagin alkalde man kan Presentacion. Nakalaban kan gurang na Deleña  iyo an sadiri man sanang tawong si Engr. Pedro Deleña (NUP).

Sa banwaan kan Garchitorena,   naagaw ni mayor-elect Nelson Bueza (PFP) ki Mayor Leda S. San Luis (NUP) an puwestong dati niya nang kinaputan kan mga nagtalikod na taon. 

Sa banwaan man kan Goa nagin matrayumpo an pagbalik politica ni Alkalde Raquel S. Lim. Dinaog ni Lim iyo si presenteng alkalde Alfredo P. Gonzaga III (PFP) na nagribay sa puwestong binayaan ni defuntong mayor Marcel S. Pan.

Si Lim an nagin alkalde  nin sarong turno. Siya esposa kan dati man na alkalde Antero Lim na dating municipal councilor/ex oficio member kan Sangguniang Panlalawigan Camarines Sur asin bise alkalde antes nagin alkalde kan Goa.

Mga alkaldeng naeleher liwat iyo sinda Jerold  B. Peña (PFP San Jose), Jovi B. Fuentebella (PFP Sagñay), Karen Polinga (PFP Siruma) asin Marilyn Co (PFP Caramoan).

Mientrastanto, an mga bagohan na local chief executive iyo sinda Dyego Pilapil (PFP Lagonoy), Board Member  Eugene B. Fuentebella (PFP-Tigaon) asin  bise alkalde Bobit Prades (PFP) na dinaog si Ruby Tuy, esposa ni incumbent mayor Ruel Tuy. 

Manonotaran na an position ni in-coming mayor Eugene iyo an babayaan na puwesto kan tugang na si three-term mayor Chiqui Fuentebella.  An nasabing position pig-ocupar man nin siyam na taon kan saro pang tugang, si Cong. Arnie Fuentebella antes na nagin representante kan cuatro distrito. 

Sa Lagonoy,  an puwestong alkalde kan huben na Pilapil na si Dyego kinaputan man nin tigtolong termino kan mag-amang si Delfin III asin Delfin Jr.

An nakalaban kan huben na Pilapil, Bebot Bona (NUP), an  dae nagtrayumpong  maagaw an poder sa pamilya Pilapil. Saro pang Pilapil, si board member JJ an nakabalik man sa politica.

Maoobservaran na sa sampolong banwaan sa Partido Area,  siyam kaini an nasa lado kan PFP, partidong kinakabalehan ni Cong. Arnie Fuentebella. Mientrastanto, saro sana an yaon sa NUP na partido kan mga Villafuerte, si mayor-elect Lim kan Goa.

Heneralmente, nagin matuninong an midterm local asin national elections sa Partido Area. Arog sa  ibang parte kan nacion, an ambos partidos nagpariribayan nin maiinit na isyu sa tribuna asin social media.

Sa tahaw asin likod kan mga isyung ini, arog  man  sa ibang parte kan nacion, nagpasiremplehan sa  haloy nang sistema sa politicang Pinoy kada panahon nin election: an “paipit” asin “karamangan”. Siring man, padagos an pagreynar kan pigmamakoapoan nang political dynasty digdi.