Tolong estudiantes kan CBSUA kampyon sa Young Farmers Challenge

Orgulyo kan Central Bicol State University of Agriculture sa Pili, Camarines Sur kan patuson kan saindang tolong estudiantes ninda an kapangganahan bilang kampyon sa ginibong Young Farmers Challenge kan Department of Agriculture dai palang nahahaloy.

An tolo nginaranan na sinda Francia Nina Jupakkal, Mark Felix Custodio asin Dominador Talle III, nakawikaw ninda an premyo na cantidad Php150,000 na financial grant tanganing gamiton na kapital para sa saindang ‘‘Piliman Food Products’’.

Sinabi ni Lovella Guarin, opisyal na parataram kan DA Bicol nagkapera pang mga State Universities sa rehiyon an nagparticipar na ginibo sa Pili, Camarines Sur asin taon-taon nang pinapadrenohan kan ahencia.

An saindang kapangganahan kan ipresentar an agri-business venture na may objetibo sa negosyo na saindang pigpuntohan asin digdi nahanga an mga jurado nganing sinda an mapili bilang ganador sa kumpetisyon.

Ipinahayag kan DA, na bako lang cuarta an saindang premyo envez makakarecibe pa nin business development services siring kan training, monitoring, market linkage asin business networking tanganing maseguro an saindang proyecto sa Young Farmers Challenge Program.