Tolong NPA gadan sa encuentro laban sa militar

Ciudad nin Iriga --- Tolong miembros kan rebeldeng New People’s Army (NPA), gadan sa encuentro kan Viernes Santo, Abril 18, 2025 sa komprontasyon sa pag-ultanan kan tropa kan 42nd Infantry Battalion (42IB) kan Philippine Army sa Barangay Sagrada, sa ciudad na ini.

Sa report kan Iriga City Police Station sa pamamayo ni COP P/Lt. Col. Jabesh Napolis an ralaban inabot nin 30 minutos na kun haen tolo an mga binawian nin buhay sa lado kan NPA mantang mayong nalugadan sa tropa kan gobierno.

An operasyon kan militar sa Barangay Sagrada, ginibo matapos nagkaperang residentes an nag-osip na iguang armadong NPA sa lugar na nangongolekta nin revolutionary taxes.

Sa sinambit na encuentro nagkaperang mga armas kan NPA an nabawi kan tropa kan Army na kinababalihan nin sarong M-16, sarong M-14 asin sarong RAA3 rifle, mga gamit personal asin iba pa.

An PNP tolos man nagbugtak nin check point sa posibleng agihan kan nagdudurolag na mga rebelde mantang nagpadagos pa sa operasyon an mga soldados contra sa mga rebelde.

Alagad saro sa kaibahan kan mga NPA an nahulog sa kamot kan militar na iyo an nagtukdo sa tolong mga nakatagong de kalibreng armas.