Tom Bongalonta buelta na bilang alcalde kan LGU Pili

Pili, Camarines Sur --- Mabuelta na bilang jefe ejecutivo kan banwaan na ini sa Abril 28, 2023 si suspendidong Alcalde Tomas Bongalonta hale sa anom na bulan na suspension.

Saiya nang pig-aandaman an pagbuelta sa opisina sa Municipal Hall na saro sa plano iyo an pagpaapod nin miting sa mga department head nganing ipasabot niya an mga plano na saiyang ipapadagos na programa.

Kabale sa saiyang reresolberan iyo an dai na sueldohan na mga job orders (JO) kan LGU kun ano an naging dahilan alagad enot nang sinabi an naheheling na isyu iyo an politica na naging causa kan pagka-gutom kan pobreng empleados.

Sinabi ni Bongalonta sa entrevista sa telepono kan Bicol Mail na igwa pa siyang duwa pendienteng casong libel asin cyber libel na sinangat ni Diputado LRay Villafuerte kan segundo distrito kan Camarines Sur na iyo man an nagsangat nin caso sa Ombudsman na naging dahilan kan pataposon nang anom na bulan na suspension.

Nagkapera nang veces sinuspende kan Capitolio Provincial an jefe ejecutivo kan kabesira kan provincia alagad segun saiya cada eleksyon mas lalong sinusurog siya kan namamanuan sa paagi nin landslide sa pirilian mantang si candidato sa provincia kulilat sa resulta kan eleksyon sa Kabisera kan provincia.

Nagtutubod an alcalde na an mga caso na sinasangat sa saiya huli sa politica na an apektado iyo an namamanuan.

Siya nakumfirmar na susuportaran si Nonoy Villafuerte Magtuto sa plano kaining magcandidatong congresista sa tercer distrito kan Camarines Sur alagad dai kabale si Diputado LRay kun madalagan sa cargong gobernador.