top of page

TPO idedestino sa mga tourist beach sa CSur

An Camarines Sur PNP Provincial Office (PPO) mawarak nin mga tourist police officer (TPO) sa mga dinadayong beach resort nin mga dayuhan asin lokal na turista ngunian na summer vacation tanganing magmantenir kan paz y orden asin sa saindang seguridad.


Si Police Capt. Marlon Lladoc, opisyal na parapahayag kan PPO nagsabi sa entrevista kan Bicol Mail na igwang Tourist Police unit an PPO Camarines Sur na nag-agi sa training/seminar kan saindang trabajo bako lang para sa seguridad maging sa pag-entertain nin mga bisita.


Kabali sa bantugan na beach resort sa Camarines Sur iyo an mga municipalidad kan Caramoan, Pasacao, Siruma, CWC sa Capitolio Provincial, maging sa Panicuason asin Carolina sa Ciudad nin Naga na nasa area of responsibility kan Naga City Police Office, Sagñay maging sa iba pang lugar sa Camarines Sur.


An Municipal Police Station sa lugar kan beach resort igwa nang pig-andam na contingency plans sa suporta kan mga TPO.


Igwang Police Assistance Desk sa mga tourist spot na masimbag sa mga kahapoton siring kun sain an pinakahuring hotel asin CP number.


An mga TPO kabali sa mga police visibility kan PNP cada panahon nin semana santa asin summer vacation, sabi pa ni P/Capt Lladoc.


Haros bilog na elementos kan PNP iwawarak bako lang sa tourist spot envez saindang prayoridad pa an safety kan publico sa maabot na semana santa, bulan nin bakasyon asin mabugtak nin mga Motorist Assistance Center sa national highway.


Ini kabali sa saindang Oplan Ligtas Summer 2024 na pig-andaman kan Bicol PNP.


Sa Ciudad nin Naga, sinabi ni City Director P/Col. Erwin Rebellion kan NCPO igwa na sindang contingency plans sa mga beach resort sa upper barangay na madestino nin TPO. (dpa)


ATULAYAN BEACH RESORT sa Sagñay, Camarines Sur saro mga dinadayong tourist spot sa provincia na piglalaoman maruso an mga dayuhan asin lokal na turista ngunian na semana santa asin summer vacation. (DRAureus Jr.)

Comentários


bottom of page