Trade Fair kan DTI CamSur halangkaw an benta

Ni Sonny Malate

Sa laog sana nin limang aldaw an trade fair na pigpadrinohan kan Department of Trade and Industry (DTI) Camarines Sur,  sa pamamayo ni Provincial Director Jay S. Ablan,  an nakatipon nin bentang uminabot sa P5.1M.

An “Feria de Camarines ft Muebles” ginibo sa sarong dakulang  mall sa ciudad kan Naga, Mayo 29 hasta Junio 2, 2025. Tampok iyo an mga muebles,  home furnishings asin decors na gibo sa local materials. 

Katabang kan DTI Camarines Sur sa paglatag kan feria iyo an gobyerno provincial kan Camarines Sur asin Metro Naga Chamber of Commerce and Industry (MNCCI).

Segun ki Rhea B. de Alday, DTI Business Counselor, iguang hasta 28ng  local entrepreneurs an nagparticipar sa opening day kan trade fair  Mga muebles, home furnishings asin decors an nakadisplay asin pigpabakal. An  mga ini gibo sa kahoy, hoyo, kawayan, nito asin iba pa.

Sinabi ni de Alday na an mga native items mabenta sa mga local asin foreigner na walk-in asin online buyers huli sa naiibang material, desinyo asin calidad. Iba-iba an presyo alagad mas macantidad an mga producto na detalyado asin butingting an desinyo.

Nanotaran pa man kan Business Counselor na an mga local entrepreneur naeencaminar na magbale sa mga trade fair huli ta nabibisto asin nabebenta an saindang mga producto digdi.

Segun sa saiya an DTI padagos na sustenido an suporta sa mga entrepreneur. Ini sa paagi kan business counselling, hands on skills training, marketing, technology enhancement asin financial linkages sa mga bangko asin lending firms.

Pigbanggit pa ni de Alday na sa mga masunod na bulan liwat sindang mapadrino nin feria. Itatampok digdi iyo an mga gubing na an material gikan sa indigenous materials arog kan sa Buhi, Camarines Sur.

Kan mga tuminalikod na bulan an DTI nagtampok man sa trade fair nin mga local na kakanon asin inomon. Ini an nagserbing dalan para sa exposure asin marketing kaini.

Mientrastanto, segun ki de Alday an saindang oficina maconducir nin sarong seminar katakod kan mga actividades sa fiesta sa banwaan kan Goa na nakacentro sa turismo, arte asin economia.

Totokaron iyo an dapit sa Philippine Creative Industry Development Act o RA 11094 asin Intellectual Property Rights for the Creative Industry of the Municipality of Goa.

Nakatalaan na magparticipar iyo an mga miembros kan United Visual Artists in Partido (UVAP) na magkakaigua nin art exhibit digdi magpoon Junio 12 hasta 23, 2025.

Muebles tampok sa Trade Fair kan DTI Camarines Sur. (Photo - Kyna de Castro)