Traffic lights, CCTV camera dai pa prayoridad ngunian na ‘24

Dai kabale sa prayoridad ngunian na taon kan City Hall an pagbakal nin bagong mga traffic lights na haloy nang dai punsiyunal maging mga CCTV camera na dapat ikabit sa mga mayor na kalye sa centro kan Ciudad nin Naga.

Sa pag-atubang sa miembros kan media, sinabi ni Renne Gumba pamayo kan Public Safety Office (PSO) kan ciudad na nakatalaan pondohan kan Sangguniang Panlungsod para sa sunod nang taon.

An mga nakabitay na traffic lights sa mga mayor na kalye asin kawaran nin CCTV camera sa centro kan ciudad haloy nang natutuyawan kan publico sa tahaw kan parating mahibog na bulos nin trafico. Mala ngani maging an ibang opisyal kan City Hall nagsabi na pang ‘display’ na sana an traffic lights huli ta dai naman nagagamit.

Magigirumdoman an traffic lights naikabit sa administrasyon ni dating Alcalde John Bongat alagad natutuyawan na ngunian nin mga motorista mas marhay pang haralion na sana kun dai na punsiyunal tanganing mayong magkantiyaw na ‘billionaire city’ an Naga alagad pang ‘display’ sana an mga traffic lights.