Trahedya sa dagat durante kan Sabado de Gloria

SAN JOSE, Camarines Sur -- Bago pa kan pagrokyaw sa  Domingo de Resureccion, enot nang namatean an makuring kamundoan dara kan sarong trahedya durante kan Sabado de Gloria, Abril 8, 2023.

Ini an nangyari sa magkaparamilyang excursionista sa kadagatan kan Barangay Dolo, San Jose Partido. Anom sa sampolong pag-iriba ninda  an nagkararigos kuta sa dagat,  alagad an mga ini mayong suwerteng nalamos asin binawian nin buhay.

An mga victima kan trahedya iyo sinda Riza Mae Pino Calimosa-17 años, Ashley Rose Rico Hermoza-16, Jhona Mae Pino Calimosa-17, Rea Mae Pino-18, gabos kan Catagbacan, Goa.

Dagdag na victima iyo an magtugang na sinda Regine -16 asin Rafael Pino-18, kan ciudad nin Naga.

Segun ki Gilbert Cea, pigmamaneho niya an sarong trimobile sakay an saiyang esposa asin duwang aki. Soboot pakahiling kan mga pamangkin niya, sinda suminarakay man kaya nagin sampolo sindang magkairibahan papuntang Barangay Dolo hale sa saindang lugar sa Catagbacan, Goa, Camarines Sur.

Nasa tahaw kan kaorogmahan an magkaparamilya kan poco mas o menos alas diez nin pagkaaga kan kaparehong aldaw, kan an pito sa sainda an dimalas na nagsumosumo sa nagrararom na tubig dagat sa may sabangan kan kadagatan sa Barangay Dolo.

Sa pangengenot ni Alkalde Jerold B. Peña asin Engr. Gabriel C. Obias asin pag-iriba sa Municipal Risk Reduction Management Office (MDRRMO), naggibo nin rescue, search and retrieval operation.  Nagtao nin asistencia iyo an Philippine Coast Guard, PNP, BFP, Philippine Army, mga Barangay Tanod asin mga volunteer.

Mismong si Alkalde Peña an nagtabang sa pagdara kan mga victima sa San Jose District Hospital.

An limang victima pigprobaran  na mai-revive kan mga nag-agap na pagtaraid na parakarigos asin mga personahes kan mga ahencia kan gobyerno. Sinda  pigdara sa San Jose District Hospital alagad pigdeclara nang dead on arrival. 

An ika-anom na victima nasaphod sa kadagatan  mga alas tres nang hapon kan kaparehong aldaw.  Gamit kan retrieval team sa paghatak kan bangkay iyo an sinsuro o fish net kan mga parasira. Si Jhen Rose Pino, 13 años, nakasalvar sa kagadanan alagad hasta sa ngonian siya bihirang maggirong huli sa iwinalat na trauma kan trahedya.

An bangkay kan anom na magpirinsan pigpapatintihan sa sarong common na harong na pig-eerokan kan tolong pamilya kan mga victima kan trahedya. Duwang kabaong an yaon sa terraza mantang an apat hararanihan na nakapwesto sa laog kan harong na gibo sa semi-concrete materials.

Mientrastanto, katakod kan pag-observar kan Semana Santa, an gobyerno probinsyal  kan Camarines Sur nagpaluwas nin Memorandum dapit sa pagcomple kan Memorandum Circular 03-14 kan Philippine Coast Guard, para sa seguridad sa mga coastal asin beach resorts tanganing mapangatamanan an buhay kan mga namamanwaan.

Sa banwaan nin San Jose Partido, nagin activo an MDRRMO sa pagmonitor asin inspection kan vicinidad kan baybayon sa barangay Sabang asin Dolo saka pagtaraid na coastal barangay bago pa kan pag-abot kan Semana Santa.

Manonotaran na sa Partido Area kun panahon kan tag-init, kadakol na mga local o dayuhan na mga excursionista asin turista an nagdadagsaan sa mga magagayon na beach resort, falls, mga isla asin swimming pool sa sampolong banwaan digdi.

Mamundo sana ta magkaminsan an kaogmahan na dara kan tag-init naiibahan nin trahedya asin iguang mga binabawian nin buhay.