Training sa cacao food processing ginibo sa Goa

Ni Sonny Malate

LAGONOY, Camarines Sur --- Ginibo an sarong aldaw na training sa pagproceso nin pulverized cacao sa banwaan na ini sa paagi kan pinagsarong esfuerzos kan local na gobyerno sa liderato ni Alkalde JB Pilapil asin kan Department of Trade and Industry (DTI) Camarines Sur Provincial Office sa pamamayo ni Provincial Director Jay Percival S. Ablan.

Segun ki Rhea De Alday, Business Counselor kan Goa DTI Negosyo Center na iyo man an nagkakapot kan Lagonoy Negosyo Center, an training pigparticiparan kan sequierra veinte (20) mga individual local entrepreneurs kan Lagonoy. Nagserbing trainor si Raquel Panizares, titser kan Tinambac District na may bastanteng pagkanood sa food processing.

Sa paagi ni Panizares, an mga participantes nakaguno nin dagdag kaaraman dapit sa pagproceso nin  cacao, arog kan tamang pagpili kan calidad kan pisog kaini, nadadapat na paghalo, packaging asin iba pa. An cacao nasa formang arog sa instant coffee mantang ini pulverized. Kadaklan kaini an pigpapabakal sa ciudad nin Naga.

Mga local entrepreneurs durante kan cacao food processing training sa banwaan nin Lagonoy. (Rhea De Alday)

Sa presente, nagdadagdag an pangangaipo kan pigprocesong cacao asin an nagkakapirang barangay sa Lagonoy an bistadong ginigikanan kaini.  An barangay San Isidro Sur an iguang Surkolate Festival kada Mayo 13-14 kan taon tanganing itampok an masiram na cacao, tablea o pulverized, na gikan digdi. 

An Lagonoy bistado pa man sa kakanon arog kan binanban, puto tabla, ampaw  asin iba pa. 

Sinabi ni De Alday na an oficina ninda an padagos na nagsusuporta sa mga local entrepreneurs sa paagi kan skills training, marketing assistance asin linkages sa mga burabod nin loans asin magin grants.

Katakod kaini, segun ki De Alday  gigibohon  sa Hulyo 12-16 an ikaapat na Feria de Camarines sa Robinson’s Naga. Itatampok  an mga de calidad asin magagayon na gubing kan mga de calibreng designer sa mga Micro, Small and Medium Entrepreneurs (MSMEs) kan probinsya. An actividad nasa pamamahala kan DTI Camarines  Sur sa paagi ni Provincial Director Ablan.

Sa paagi kan mga pigpapadrinohan na trade fair  kan DTI,  orug pang narereconusir an kagayonan asin calidad kan mga local na producto. Ini nagigin dalan sa paglangkaw kan benta asin oder magin kan mga dayohan na negociantes. 

Mientrastanto, padagos an pigtataong suporta  ni Alkalde  Pilapil sa  mga MSMEs sa banwaan nin Lagonoy. Sa mga ginigibong trade fair sa Naga o magin sa Lagonoy mismo, si Pilapil an dayaday na nagpapaabot nin asistencia sa mga entrepreneurs na nagbale digdi.

Kabarale iyo an mga residentes na invuelto sa proyektong pangkabuhayan, arog kan paggibo nin samhod, calamansi juice processing, sa pagsisira, pang-agrikultura asin dakol pang iba.

An pagrambong kan mga saradit na negosyong  pangkabuhayan kan mga namamanwaan saro sana sa flagship programs na pigpupursige ni Alkalde Pilapil ngonian.