Traslacion procession ki Ina heneralmente nagin matuninong

Dawa nagkaperang mga insidente nin pagpasaway kan ibang voyadores sa traslacion procession alagad sa assessment kan Naga City Police Office (NCPO) heneralmente nagin matuninong sa tahaw kan labi sa tres mil na kapupulisan an nagtaong seguridad sa Festividad ni Ina.

Pinangenotan ninda BGen Nestor Babagay Jr., regional director kan PRO-5 asin PCol Gilbert Farinas, OIC Director kan NCPO yaon man an presencia kan mga soldados kan 9th ID mantang katuwang an criminology interns nganin maseguro an solemnidad asin seguridad sa voyadores, peregrino asin devotos sa nagtapos na traslacion procession. Afuera pa kaini, nagwarak pa nin kapupulisan sa iba pang mga matawong lugar nganing maseguro an paz y orden.

Sa lado kan simbahan, sinabi ni Director Francis Tordilla kan Caceres Commission on Communication naheheling ninda na makahulogan an ginibong traslacion procession sa Ina kan Bicolandia dawa iguang menor na insidente. An procession naging positivo si resulta huli sa participacion kan manlaen-laen na sektores nganing madara an Imahen ni Nuestra Señora de Peñafrancia asin Divino Rostro sa Naga Cathedral para sa siyam na aldaw na Misa de Novernario.

Mientras na nagtutubod an Joint Operations Center kan ciudad na saro sa nakatabang an dakul na nakawarak na kapupulisan asin nagtaong proteksyon sa procession nganing maseguro an paz y order dawa dai nahahalean na nagpapasaway na burat na voyadores.

BGen Nestor Babagay Jr. regional director kan PRO-5 nagtataong instruksyon sa tres mil na augmentation force kan PNP para sa seguridad kan Peñafrancia fiesta. (NCPO)