top of page

Tricycle ‘‘bawal talaga’’sa national road - DILG

Dawa igwang franquicia kan mga lokal na gobierno (LGUs) sa operasyon kan tricycle alagad ‘‘bawal talaga’’ sinda magviaje sa national road asin kabale sinda sa road clearing operation.


Ini an patanid kan Department of Interior and Local Government (DILG) matapos i-uktaba an ‘‘road clearing operation 2’’ alagad ipapadagos sa Febrero 16 hasta Marso 2, 2021.


An pag-uktaba kan DILG huli kan mga ginigibong preparasyon kan LGUs sa vaccination program.


Si Provincial Director Melody Relucio kan DILG Camarines Sur nagpahayag sa media na an tricycle kaayon na sa Validation Version 2 mantang dai tinutugot sa national highway an pagviaje kan tricycle nin huli ta delicado sinda sa mga aksidente.


Dapat igwa digdi nin compliance an LGUs alagad igwa naman nin exemption kaipuhan sana an sertificasyon na mayong alternativong ruta nganing agihan kan tricycle.


An solusyon digdi seguradohon na igwang ordinansa na igwa sanang especificong oras an pagdalagan ninda sa national road.


An ika-duwang road clearing operation kabale na an mga barangay piglalaoman na antes mag-abot an grupo kan validation team nahale na an mga ilegal na estractura sa mga road right of way.


Problemado an ibang LGUs sa Camarines Sur sa operasyon kan tricycle huli ta mapipiritan sinda maghanap nin bagong ruta nganing dai magbagsak sa grado sa gigibohon na inspeksyon kan grupo kan DILG.


An mabagsak sa validation kan ahencia maatubang nin caso adminitrativo asin tatawan sinda nin pagkakataon na magpaliwanag antes an legal action, sabi pa ni PD Relucio.


Si Presidente Rodrigo Duterte iyo an nagpaluwas nin directiva sa DILG na iimplememtar an road clearing operation asin si dai masunod maatubang nin caso administrativo.


Kan nagtalikod na taon pigtalaan an pagbuelta kan road clearing operation, sinuspende muna huli kan pandemya sagcod na nagdeclara nin Enhanced Community Quarantine kan Marso 16 si Presidente Duterte. (DPA)



コメント


bottom of page