Tricycle sector, PUJ apektado kan libreng sakay kan LTFRB

Apektado na kan halangkaw na presyo nin petrolyo, nadagdagan pa kan libreng sakay mantang kulang na nin pasajeros an pampasajerong tricycle maging an mga public utility jeepney na dai kabale sa Service Contracting Program kan Land Transportation Franchising and Regulatory Board (LTFRB).


Si Domingo Porlaje, manager kan Pinag isang Samahan Trimobile sa Naga (PISTON) nagpahayag na apektado sindang mga nagkakayod huli ta kulang na an naglulunad sa tricycle maging an kadakle sa public utility jeepney na dai kabale sa SCP kan LTFRB.


Alagad sinabi ni Porlaje dai man sinda contra sa programa kan LTFRB mantang nakikinabang digdi an ginatos na pasajeros aroaldaw.


Namumundo man an mga tsuper asin operator kan tricycle ta dai sinda kabale kan Service Contracting Program kan LTFRB.


Nagkapera nang PUJ an nagpundo na kan saindang aroaldaw na pagkayod huli ta aroaldaw lugi na sinda halangkaw pa an cada litro kan crudo kulang pa an pasajeros mantang dejado sinda kan libreng sakay.


Agrangay na an trimobile sektor sa saindang hanap buhay may minsan natabla na sana sa saindang pagkayod kaya ngani an iba napundo na ngona asin nahanap nin ibang hanap buhay.


Maririsa ngunian na kulang an PUJ an nagkakayod sa centro kan ciudad kun malulugi man sana mas marhay pang halaton na magtapos na an contrata sa libreng sakay.


Naiintindihan kan mga operator an reclamo kan tsuper kun dai na ngona nagkakayod.


An regular na flete sa PUJ cantidad 9 pesos alagad an ibang pasajeros nakakaintinde dai na nakua kan uli kan jeepney driver.


Hagad kan sektor nin transporte sa gobierno na suspendiron na muna an excise tax nganing mabawasan an halangkaw na presyo sa produkto nin petrolyo.


Alagad namumundo an sinambit na sektor huli ta bota bongod an paluwason na Duterte administration. (dpa)