TRUMP

Sa TV kasubago, nasambitan kan si announcer na dae daa makaka abot si Mama niya sa “Thanksgiving Dinner” kan pamilya ninda. An rason - nag boto kaya daa siya ki Trump.

Sigurado arog man kaini an mga mangyayari sa dakul na pamilya. Iriwal iwal ta napikon o na daog si mga kandidato ninda. Kaya may mga bakanteng tukawan sigurado sa “Thanksgiving Dinner” asin baka mag abot pa siguro sa media noche sa Krismas an dae pag tirinuan na ini.

Tapos na an eleksyon sa Amerika. Si Trump an nangana. Mayong nahiling na darayaan. Nag desisyon na an kadaklan kan tawo. Matuninong si eleksyon.

Ginana niya an mga boto kan mga Hudeo, Muslim, Katoliko, Evangelio, mga Latino, mga Itum, mga Asiano, mga Puti asi iba pa. Nangana siya sa pig aapod na popular na boto nin mga 5 million. Ginana niya man an pig aapod na “swing states”.

100% niyang nakua si mga nag duduwa-duwang mga estado bago mag eleksyon.

Sa madaling sabi nagka igwa siyang sarong “landslide victory”.

Kadakul na tawong nangalas ta dakula si gana ni Trump. An sabi kan iba, bako kaya daang tamang kandidato kan mga Demokrat si Haris. Dae na kaya daa si Harris pina agi sa sarong borotohan na kombensyon. Basta pinili na lang siya na ribayan si Biden. Dae na daa sinda naka pili nin mas marhay.

Grabe si karampanyahan. Nagka gastos si Harris nin sobra sa sarong billion na dollar na ginamit sa pag kampanya. Pero nagka utang pa siya nin 20 milliones.

Si Trump naka gastos lang nin mga 345 million pero organisado si pag gastos niya.

Pag abot sa mga sikat na artista na nag endorsa ki Harris, kabali dyan sina Lady Gaga, Taylor Swift, Beyonce. Katy Perry, Ricky Martin, Bruce Springsteen, James Taylor, Christina Aguilera, Cardi B, Oprah, asin dakul pang iba.

May mga nag erdorsar man na mga artista ki Trump pero bakong arog ka sikat kan mga artistang kinua ni Harris. Sa pagka aram ko dakul man nag tabang ki Trump arog kina Hulk Hogan, Kid Rock, Kanye West, Mel Gibson, Jim Caviezel, Dr. Phil, asin igwa pa man na iba.

Sa pag mati ko maski na ngani yaon na gabos na sikat na tawo sa lado ni Harris, si plataporma ni Trump mas nakaka kumbinsi nin tawo. Ginamit niya an saiyang sentido common o pigaapod na common sense.

DUWANG BAGAY an ipina abot nyang problema kan Amerika na sabi niya papakarayon niya tulos.

Primero iyo an problema kan mga illegal na immigrante sa Amerika ngunian.

An ginibo ni Biden saka ni Harris kan pag tukaw ninda sa pwesto, binuksan ninda an mga border kan Amerika asin nagralaog an mga pirang million na illegal na migrante. Pinondo na Biden si mga pag kudal kan border na pinunan ni Trump kaidto. Dakul na na angot sa ginibong ini ni Biden saka ni Harris.

An nangyayari ngunian, kun illegal ka, tatawan ka pa nin cell phone, allowance, housing, libreng kakanon, libreng ospital, bulong, libreng pamasahe sa eroplano kun sain mo gusto mag duman asin tatawan ka pa nin parol nganing pwede mag trabaho.

Pero kun taga digdi ka, ma bayad ka sa cell phone, ospital, pamasahe, housing, etc…

Mientras tanto itong mga nag apply na mga legal, nag hahalat nin 3, 5, 10, asin na abot pang 20 taon nganing maka laog asin maging legal sa Amerika. May mga bisto akong nag haralat abot 20 taon magka green card lang. Kun tama an isip mo, duman ka na ki Trump na nag promesa na e dedeporta niya itong mga nag laog na illegal.

An saro pang konsekwensya kan mga illegal iyo an pag lankaw nin mga krimen arog kan mga illegal na nagralaog na MS 13 gang asin mga gang na hali sa Venezuela na mga killer asin nagtitirinda nin droga.

Mapa pano ko an mga pirang pahina kun susumahon ko an mga nangyayari sa New York ngunin na maski na ngani an democrat na alcalde kan New York nag uuyon na ki Trump sa problema kan mga illegal na migrante.

IKA DUWA iyo an ekonomiya. Kan pag tukaw na Biden saka ni Harris nag langkaw si gasoline, si mga karne, gatas, de lata, gulay, prutas, kuryente asin gabos na barakalon. Na eksperyensa ko ini ta kaidtong panahon ni Trump dakul na akong mga mababakal na groceries sa Target kun may 100 dollars ako. Ngunian, kulang na maray an 200 dollars sa mga pareho kong pag grocery kaidto.

Sa pag mati ko na raya na an mga tawo sa kamahalan nin mga kakanon asin sa illegal na immigrasyon.

Simple lang an kaipuhan kan mga tawo, kairiba na ako dyan ta retirado na man ako asin hababa man lang an pension mi.

Gusto mi man lang nin katuninungan asin makakayang mga presyo kan gasoline asin kakanun. Iyo man an gusto kan mga simpleng tawo. Napa abot ni Trump an mensahe niya.

An saro ko pang gusto sa maabot na administrasyo ni Trump ta maibabalik na naman an Ten Commandments sa mga eskwelahan. Dae na tutugutan ni Trump an mga lalaki sa mga sports kan babae. Pupunduhan naman ninda an pag gamit kan mga lalake sa mga banyo kan babae. Siguro dapat ibali na dyan na ibawal na pwede mag boys scout an babae.

Pinapa ngadye ko lang na tabangan si Trump kan mahal na Kagurangnan. Duwang bese na siya probaran asasinaron asin dinitan na sya ma puro sa payo. Pero may plano saiya an Diyos.

Admitido ni Trump na si Jesus an nag salvar saiya. Si Jesus lang daa an Boss niya.

Sa ngunian lingawan ta na an naka aging eleksyon. Mag tarabangan kita. Magka sararo kita. Dakul kaya dyan na dae pa ngani nakakatukaw si Trump pero pigmumuruda na ninda.

An masasabi ko lang sa mga nangyaring ini, masasalvar lang an Amerika kun pirmi tang ilaag sa enutan ta pirmi an Mahal na Diyos.

Dios Mabalos po sa pag basa.