Tsuper kan e-vehicles dapat igua nang licencia

Kinakaipuhan iguang nang licencia sa pagmamaneho an siisay man na nagpapadalagan nin e-bikes asin e-trikes sa ciudad nin Naga. Ini an saro sa nagkaperang dapat sunodon ninda kun ma-viaje sa bike lane kan national road.

Si Consejal Omar Buenafe, pamayo kan Transport Committee sa Sangguniang Panlungsod nagsabi na kabale pa sa saindang pinagkasurondoan sa ginibong public hearing iyo an mga minasunod. 1. Dapat rehistrado an e-vehicles sa lokal na gobierno kan Naga; 2. Tinutugotan kan ciudad an mga hale sa pagtaraid kan ciudad alagad kaipuhan magsunod sa mga ley trafico; 3. Dapat rehistrado an mga e-vehicles dawa hale sa ibang banwaan; 4, Prohibido na an magmaneho an mga menor de edad; asin 5. Dapat sa gilid sana sinda nag-aagi para maseguro makalikay sa aksidente.

Sa public hearing na ginibo kan Viernes, Deciembre 5, 2025 presente an mga naggagaramit nin e-vehicles na presente si hale sa iba pang mga banwaan asin representante kan LTO.

Sa lado kan LTO nagpatanid man na saindang estrictong ibababawal an pagpaagi sa nationa highway siring kan Almeda Highway, Diversion Road asin C5. Nakatalaan nindang iimplementar sa Enero 2, 2025.

Kinaogma man kan Bikes Association sa Ciudad nin Naga sa pamamayo ni Trinity Mayor matapos kan saindang pag-atendir sa public hearing na nagseguro na masunod sa mga reglamento na pinaluwas kan komite.

Labi sa cuatro mil an e-vehicles sa ciudad na an iba sa sainda ginigibong panghatud asin sundo nin mga estudiantes aroaldaw. Dakulang bagay sa magurang huli ta sinda na an naghahatud-sunod sa saindang mga aki sa elementary schools, dai pang peligro sa paglunad sa pampasajerong vehiculos.

An Land Transportation Office (LTO), enot nang nagpaluwas nin patanid na babawalan na an mga e-vehicles na mag-viaje orog na sa mga national road, alagad envez kan Deciembre 2, 2025 saindang estrictong iimplementar an pagbawal sa national road sa Enero 2, 2026.

An mga LTO District Office naglalansar na nin information drive sa mga reglamento nganing antes sinda dakopon o dagos nang iimpound aram na an mga pulisiya.

Mga tsuper kan e-bikes asin e-trikes obligado nang magkua nin licensiya sa pagmaniho. (BM)