Tsuper kan trak na naka-aksidente sa Albay, pinadarahan SCO kan LTO

Nag-isyu na nin ‘‘show cause order’’ (SCO) an opisina rehiyonal kan Land Transportation Office (LTO) sa pamamayo ni Regional Director Edgar Allan Castillejos sa tsuper kan trak asin sa rehistradong kagsadiri kan trak huli sa nangyaring dakulang aksidente sa pagkakabudal sa pampasajerong van na gikan sa Nabua, Camarines Sur.

Tinatawan sinda nin sampolong aldaw nganing pasimbagon sa posibleng pag-atubang nin caso nin reckless driving base sa section 48 kan Acta Republica 4136.

Sa imbestigasyon kan PNP an vehiculo posibleng may depekto na an dalagan alagad pinirit pa kan pasaway na tsuper.

An aksidente nangyari sa Camalig, Albay na 11 an mga binawiaan kadakle hale sa Nabua, Camarines Sur, duwa hale sa Ligao, Albay asin saro taga Ciudad nin Naga.

Kabale sa mamundo na-aksidente iyo an duwang residentes kan Nabua na nakatalaan nang kasalon kuta ngunian na bulan na Deciembre 2025, alagad an desisyon kan familia dawa na binawian nin buhay ipadagos an kasal.

Napag-araman pa sa LTO na bako lang an tsuper kan trak an pig-isyuhan nin ‘‘show cause order’’ envez maging an operator kan pampasajerong van na igua gabos nin sampolo nganing maaraman an kakayahan kan saindang mga pampasajerong vehiculo.