Tubig, tubig kurahaw kan Liga sa MNWD

Tubig, tubig, ini an boses kan Liga ng mga Barangay sa Ciudad nin Naga sa paagi kan privilege speech kan saindang representante sa consejo na si Liga President asin Consejal Corazon Peñaflor na hinahagad sa Metropolitan Naga Water District (MNWD) na dapat maglibot an saindang water lorry truck nganing magbariwas nin tubig sa mga residentes sa barangay.

Sa sesyon regular kan Sangguniang Panlungsod kan Martes, Agosto 20, 2024 sinabi kaini, na an inaatubang na krisis sa tubig sa ciudad dapat ipaliwanag kan manijamiento sa pamamayo ni General Manager Florencio Mongoso Jr. asin ano an saindang ginigibong solusyon.

Nagrarani na an Peñafrancia fiesta mapapasupog an Ciudad nin Naga sa krisis na ini na perang bulan nang tinitios kan consumedores nin tubig.

Ginatos nang residentes kan ciudad nagrereclamo na mayo nang nagluluwas nin tubig an saindang gripo.

Sa mga pahayag sa media ni Choppy Del Cruz, opisyal na parataram kan manijamiento kan water district padagos an saindang ginigibo sa paagi kan pagpatugdok nin mga pumping station. Pigdadahilan an nakaaging El Niño phenomenon na nagbaba si water level sa mga pumping station asin burabod nin tubig naghahale sa upper barangay kan Pili, Camarines Sur.

Nag-uuran na alagad bako pang bastante an suplay nganing masimbagan an pangangaipo kan consumedores, sabi pa.