Tungtong Sa Riles

Kaming mga aki kaidto, nagdudurulag sa harong, para dalaganon sana asin maabot an estasyon kan PNR sa Triangulo. Nagtutubod kami na kung kami maka tungtong sa riles, garo man sana kami naka abot sa Manila. Tanganing bakong mapagal an pag dalagan pasiring sa PNR, nagdadara kami nin kanya kanyang paligid arog kan luma na rueda nin motorsiklo o rueda nin bisekleta ta pagmati kan mga aki, kung may dara siya nin paligid garo man sana siya naka sakay sa awto, dai namamati an kapagalan. An kawat na paligid inot pang nadiskubre duman sa Englatera, ta iyo ini an mga kawat kaidto kann mga aki duman alagad ngonian na mga panahon mayo nang aki ang nagkakawat nin paligid sa tinampo ta nababangkag na sa internet. Totoo man nanggad na sa mga aki kaidtong mga dekada 60 an riles kan tren iyo an simbolo nin Manila, kung kaya masiramon an samuyang pagmati kun kami nakaka laog sa estasyon kan PNR, asin kun mahiling mi an riles naghuhuna kami na duman sa inotan iyo na an Manila. Pero kan ako maka abot na sa Manila kaidtong mga taon 70, mas dakula an sakuyang kaogmahan ta gulpi akong nadadangog na mga tawo na nagtataram nin tagalog ta sa samuyang baryo an nagtataram nin tagalog, garong mayaman asin miembro kan alta Sociedad. Ang aki na nagtatagalog sikat sa karawatan asin siya inaapod na “ Galog”. Sa amay na edad na 18 pinadara ako kan sakuyang magurang sa Manila tanganing maglaog sa Military duman sa Tanay Rizal. Duman ko namatian an mapreskong lugar, malinig asin tuninong, tunay na baryo na malinig an doros asin masagana an pagbuhay. Yaon sa Tanay Rizal an dakulang kampo kan Phil. Army na iyo an Camp Capinpin. Nakidagos ako sa familya ni Fred asin Dolly Ragay na parehong mga bikolano, kaya lang dai akong suerte na maging soldados kaya nagbalik ako sa Manila tanganing maghanap nin trabaho. Minsan sa pag ulay ulay mi kan sakuyang ina na ngonian 89 anyos na, sakuyang naistorya saiya na kaidtong yaon ako sa Manila solamente an puedeng trabaho na sakuyang malalaogan iyo an ”boy” o “helper”. May kadikit na kamunduan sa mga mata kan sakuyang Ina, kan sakuyang iistorya saiya na kun saindang naaraman an nangyari Sakuya sa Manila, siguradong mamumundo sinda asin maturo an luha ta an saindang aki na pig dara sa Manila para mag adventure, minsan pang naagahan sa madiklom na gilid kan lumang Rizal Stadium sa FB Harrison harani sa Central Bank. Dara kan kawaran nin kwarta, mayo ako nin pamasahe sa jeepney tanganing makapuli sa harong kan sakuyang tiyo sa kalye Lourdes sa Ciudad kan Pasay. Salamat ta mayo man ako nin aki na naka experiencia kan arog ko na nalaom sa makusog na uran sa Rizal Stadium, nagugutom asin mayong maturogan. Totoo man nanggad na magayonon an Manila, alagad deficil maghanap nin trabaho kun mayo ika nin tinapusan. Sa kakulangan pa nin mga tawo sa Manila, nababanaagan digdi an kalinigan, kagayonan asin ayahay nin buhay. Sa satuyang mga bikolano an PNR iyo an simbolo kan satuyang lahi, na bistado an mga bikolano sa Tren ta iyo ini an mayor na transportasyon kan satuyang mga Ninuno.