top of page

Turismo



Ngonyan na panahon nin tig-init an mga tao, maguin mga Bikolano o bako, gustong magralakwatsa sa manlaen-laen na lugar kan rehiyon tanganing magpa-presko, maglangoy-langoy asin magtanaw nin mga magagayon na lugar.


An Camarines Sur na pinaka-dakulang provincia kan Bikol mayaman sa mga interesanteng lugar arog kan Buhi na may pinaka-saradit na sira na pig-aapod na tabios o sinarapan, mga masiram na sira na tilapia, may Lake Buhi asin pitong saradit na danao na estada kan sinarapan o tabios, Mt. Asug asin lenguahe na pinaka-dipisil na taramon maski kan mismong taga-Rinconada.


Yaon sa Buhi an pinaka-matitibay magsurat asin madudunong na eskwela mala ta may sarong naguin number 1 (topnotcher) sa bar exams para abugado sa enterong nasyon.


Yaon man an Lake Bato na estada kan ibang klaseng tabios, mahiwas an tanoman nin mahamis na pakwan asin pabrika nin bantugan na pansit Bato na pigbabarakal nin kadakul na mga tao hale sa man laen-laen na parte kan nasyon.


An banwaan na Bato iyo an enot na inabot kan mga Espanyol haling Kabisayaan kan magdantol sinda digdi sa Bikol.


An mga Kastila nag-agui sa Bikol River pasiring sa kataid na banwaan kun sain sinda nagbugtak kan dakulang banwaan na Nabua na kadto sakop pa an Iriga asin Bula.


Siyempre yaon an Caramoan na kadakul na magagayon na lugar na pigdadayo na ngonyan nin rinibong mga tao bako lang hale sa Bikol kundi hale sa ibang provincias kan Pilipinas asin hale sa abroad.


Sabi kan sarong Caramoanon na ngonyan saro nang kapitana na binayaan an saiyang lugar tangarig magtrabaho sa Manila ta mapungawon daa an Caramoan na palibot nin kadagatan kadakul baybayon asin hararayo an distancia kan manlaen-laen na barangay.


Kan magpuli siya hale nin Manila kadakul na nin tao an nagbibisita sa saiyang banwaan kaya nagtugduk siya nin sarong hotel na pigdadagusan nin kadakul na bisita.


Sa Caramoan na pati an pig-shoshooting an mga sikat na pelikula sa Europa na pigdadalan nin milyones sa palibot kan kinaban.


An Tinambac ngonyan bantugan na dahil sa pig-aapod na Caloco Beach Resort. Igwa ini nin mga coastal na barangay na kahampang na kan Pacific Ocean.


Kan matinampohan an banwaan na Siruma gulpi na an mga taong nagdadalaw duman bako lang mag-swimming, magbakal nin sira kundi magbakal pa nin mahihiwas na daga. Bantog an Siruma sa pig-aapod na white rock na pig-guiguibong plato asin iba pang gamit sa kusina na pigbabakal maski sa luwas kan nasyon.


An tinampo haling Sangay pasiring sa Tiwi, Albay pig-aapod na Partido Riviera ta magayonon an vista habang nagbibiyahe sa halabang tinampo sa gilid kan bukid sa ibong asin kadagatan sa balyo na peligroso kun dai mag-maan an biyahero, igwa pang Nato Beach asin Atulayan Island.


An Tigaon na kunsideradong political capital kan CamSur iyo an banwaan kan Fuentebella na labi nang 100 na taon na nagrereynar sa CamSur partikularmente sa Partido Area.


An kataid na banwaan na Goa nasa tahaw lang kan kadakol na banwaan pero iyo an pinaka-dakula asin pinaka-mayaman sa distrito. An kataid na Lagonoy iyo an pinaka-dakula an kadagaan mala ta an baryo kaining Parugcan guinibo nang suhay na banwaan na Presentacion.


Kun dai pinaburan kan mga Amerikano an Simbahan Katoliko kuta na an Lagonoy iyo an centro kan relihiyon sa enterong Kabikolan ta yaon digdi an estada kan Aglipayan Church o Philippine Independence Church.


Sagkod ngonyan magkataraid an mga simbahan asin kapilya kan duwang relihiyon.


An Pili, an capital town iyo an kinamumugtakan kan capitolyo provincial ngonyan poon pa kan 1955. Kontrobersyal an Pili ta an alkalde kan banwaan kalaban pirmi kan gobernador kaya darato siyang nasususpendir. Kuta na an higanteng Bikol International Airport na namumugtak sa Pili kaya lang harabo an mga propitaryo kan mga daga na ipagamit an daga kaya lugod an dakulang airepuerto dinara duman sa Daraga, Albay.


An Pasacao iyo an pig-aapod na summer capital kan CamSur.


An Libmanan an pinaka-dakulang banwaan ta may 75ng barangay asin diyan ngonyan naka-estar si Congressman LRay Villafuerte na iyo an konsideradong political kingpin kan provincia. An Gobernador na si Luigi, aki ni Cong Lray, asin an congressman sa Rinconada na si Migs dati nang Gobernador, aki pa ni LRay.


An banwaan na Del Gallego , Tagalog speaking na ta kataid na kan Quezon province.


An Ragay na binatak kan Andaya Highway na dating pig-aapod na Quirino Highway estada kan mga Andaya, an mag-amang Rolando Sr asin Rolando Jr pareho naguin chairman kan Appropriations Committee sa Kongreso kaya pareho naguin poderoso. An aki naguin Budget Secretary pa kan panahon ni GMA.


Sabi kaidto ni gurang na Andaya kan nabubuhay pa, an Ragay maguiguin ciudad na ta aaguihan kan Andaya Highway bakong an Libmanan maski kadara-dakula ta an centro nalaog-laog pa harayuon sa highway.


Ngonyan an mga Villafuerte na an nasa puwesto pwedeng maguin ciudad na an Libmanan, an balwarte kadtong depuntong Jose Bulaong kan nabubuhay pa.


Am sikat na Bicol Sanitarium, an ospital kan mga leproso yaon sa banwaan na Cabusao. Ngonyan saro nang Regional Hospital para sa mga senior citizens.


An banwaan na Calabanga pwede maguin sarong ciudad kun miyembro kan pamilya Villafuerte an masangling congressman na hale sa kamot ni Representante Gabby Bordado na iyo an nakatukaw ngonyan.


An makangalas sa CamSur ta an mga banwaan na nakapalibot sa Naga na orihinalmente pig-aapod na Ciudad de Caceres, centro kan Catolisismo sa Kabikolan an kasaradit-sadit na banwaan arog kan Gainza, Milaor, Canaman, Magarao asin Bombon.


Pero an Quipayo district sa banwaan na Calabanga iyo an pinaka-antigong parokya kan Camarines Sur haros kaedad kan Naga asin Canaman.


An Canaman iyo an centro kan Bicol standard language na piggagamit kan mga padi sa saindang sermon asin sa mga Bibliya, misal asin novena.


An San Miguel Bay na nakapalibot sa Calabanga sagkod Cabusao iyo an estada kan famusong abo asin matatabang kasag.


Kun may Bulkan Mayon an Albay, igwa man Isarog an Camarines Sur. An Mt. Isarog konsideradong aktibo bilang water volcano.


An ciudad nin Naga pinaka-gurangan asin pinaka-dakula iyo an centro kan negosyo bako lang sa CamSur kundi sa Bilog na Bikolandia.


Sa mga namamahala kan turismo sa CamSur na napapanahon na na liboton ninda an 35ng banwaan asin 2ng ciudad an maogmang Lugar asin an City of Superstars.


Dapat an CamSur ta mayaman sa paroy asin pananom kaiba sa mga mauswag na provincia kan Pilipinas pero mayo lamang.


Hapot kaidto: Ano an turismo pigkakakan? Sabi ko iyo mala ta an pinangat sa Albay asin tinuktok sa Camarines Sur sikat na sikat siring man an carpa sa Bula, an mga turingan asin sibubog sa Pasacao, an mga sira sa Lagonoy Bay asin sa San Miguel Bay pig-aaragawan, mahal na pati.


Hale sa Camarines Sur an mga sikat na si Amalia Fuentes, Celia Fuentes, Aga Mulach, Niήo Mulach, Venus Rach asin an superstar na si Nora Aunor.


Sikat an Camarines Sur asin mga taga-Camarines Sur bako lang ta makukuarta an mga politiko iyan an dapat aramon kan mga lideres, kan mga politiko asin may control kan dinastiya panahon na tanganing iwagayway an bandera kan Nueva Caceres asin Camarines!

Comentários


bottom of page