Turismo nakakabangon na sa Ciudad nin Naga

Nakakatabang sa pagbangon sa dalagan kan negosyo sa Ciudad nin Naga an Alert Level 2 sa quarantine classification mantang pinatugak na an tourist restriction sa cincuenta (50) por ciento sa indoor establishment.


Panahon na nin Pasko ginatos na an nagpupuroli sa Naga mientras na tinutugotan kan national IATF an 50 por ciento sa mga establisimiento iyo naman an pig-iimplementar sa ciudad.


Ini an mga pahayag ni Consejal Sonny Rañola, Chairman kan Committee on Tourism sa Sangguniang Panlungsod (SP), alagad sa mga plaza, park asin iba pang pagtitiripon sa luwas kan arin man na establisimiento tinutugotan an 70 por ciento.


Sinabi pa ni Rañola kun sa luwas kan establisimiento an okasyon kaipuhan magdara giraray nin ID na sinda ‘‘fully vaccinated’’ asin kun dai pa o single dose palang dapat igwang maybitbit kan ‘‘negative swab test’’ base sa pinapasunod kan Health Emergence Response Task Force (HERTF).


Nagdadakul na an mga naglalaog sa mga mall asin sa restaurant na may minsan sobra na sa 50 por ciento.


Binaba sa alert level 2 an Ciudad nin Naga sa tahaw kan padagos na paghuros kan caso sa coronavirus disease (Covid-19). Huli kaini, naging tugak muna an City Hall sa mga pig-iimponer na restriction.


Sa datus kan Bicol Central Station, ipinahayag na kun dati kulang an mga pasajeros pauli sa ciudad hale sa National Capital Region, perang aldaw nang naheheling na nagdadakul an mga ‘‘balik bayan’’.


Sinabi pa na dakulang bagay sa tourism arrival sa Ciudad nin Naga an nakatalaan na apat na darakulang aktividades sa ciudad sa premirong semana kan Deciembre 2021.


Duwang nasyonal asin duwang pang rehiyonal an mangyayari na may relasyon sa turismo na nakatalaan ilansar sa Deciembre 3 hasta 5, ngunian na taon.


Si Daniel A. De Leon, chairman kan Bicol Regional Tourism Council nagsabi an apat na mga actividades: an National Travel Show and Expo; 17th Bicol Regional Tourism Congress; General Membership and Business Meeting; Tourism-Oriented Private Stakeholders.


Sinabi an industriya sa turismo enterong apektado kan pandemya asin sa sinambit na pagtitiripon dakulang bagay nganing masuportaran liwat an mga restaurants, hotels, resorts, asin travel agencies.


An lugar kan actividades gigibohon sa Robinson Mall asin Villa Caceres Hotel.