Turismo sa Bicol apektado pa kan pandemya - DOT

Dawa nasa 80 por ciento kan mga lokal na turismo sa Kabikolan an magbubukas kan saindang lugar para sa turista alagad dakul pang mga LGU asin provincial tourism sa Bicol an dai pa preparado mantang igwa pang mga caso kan Covid -19 dawa na ngani padagos nang naghuhuros.

Si Herbie Aguas, regional director kan Department of Tourism nagpahayag na dai pa andam an ibang mga LGU asin provincial tourisms sa Kabikolan nganing bukasan na an saindang lugar para sa turista huli ta apektado pa kan Covid-19 na dai pang kasegurohan kun nuarin mawawara an virus.

Saiyang pigbuyagyag na an provincial tourisms na nagduwaduwa pang magbukas iyo an Bulusan Lake asin Butanding sa Sorsogon.

Alagad ibinaba na sa alert level 2 an Kabikolan kan national IATF puon sa Febrero 16 hasta 28, an LGU kan Sorsogon nagbukas na liwat sa turista sa pigdadayong Butanding sa Sorsogon.

An ibang mga lugar na dating dinadayo nin mga turista alagad pig-aadalan kun maninigo na dawa na ngani igwa nang pagtugot an gobierno nasyonal na puede nang magbukas kan saindang mga negosyo maging sa tourism industry alagad kaipuhan magsunod sa health protocols dawa na pighuros na sa alert level 2 an Bicol.

Inaabangan kan mga establisimiento an saindang pagbukas sa turista para sa dayuhan hale sa ibang nasyon mantang saro ini sa makakabuhay kan saindang negosyo.

Dakulang tabang sa sainda na dadayuhon nin turista an rehiyon kun tutugotan na kan gobierno an international flights sa Bicol International Airport sa Daraga, Albay.

Sa ngunian nakakatabang sana sa mga tourist hotels iyo an pagdagsa kan mga candidato nasyonal kun nagkakaigwa nin political rally alagad limitado sana an aldaw.

Maging an dakulang tiripon kan mga candidato dakulang bagay sa sainda na haros duwang taon apektado an saindang negosyo huli kan pandemya. (dpa)