Turismo sustenido kan LGU Siruma, CamSur

Ni Sonny Malate

SIRUMA, Camarines Sur --- Sa tahaw kan dakulang tabang sa economia an turismo padagos na sustenido kan local na gobierno kan banwaan na ini an mga programa dapit sa turismo, arte asin cultura. Magpoon sana kan enot na termino ni Alcalde Carina R. Polinga,  an gobierno local digdi an nagtao  na nin significanteng pagpapahalaga, orug na sa turismo mantang an banwaan na ini iguang dakulaon na potensyal sa ladong ini.

Si Polinga an pursigidong mailaag sa prominteng lugar an Siruma sa tourism map kan rehiyon nin huli sa mga oportunidad na bubukasan kaini para sa  saiyang banwa sa economia, pagprotehir kan kapalibotan, pagpauswag kan infrastructura asin dakol pang iba.

Segun ki Mikhael  Duhaylungsod, Tourism Officer I, an alkaldesa higot na nakikipagtabangan asin nagkakalap nin asistencia sa mga ahencia kan gobyerno asin pribadong sector tanganing maparambong an turismo sa Siruma.

Sa presente, si Polinga an nakikipagtabangan sa Department of Public Works and Highways (DPWH) asin Department of Tourism (DOT) sa Tourism Road Infrastructure Program (TRIP) kaini  tanganing makinabang an banwaan sa programang ini.

Katabang kan alcaldesa sa pagbusol kan turismo digdi iyo an Siruma Tourism, Culture and the Arts Office. Sa presente, an oficinang ini an naggibo nin mga initiativa tanganing masusteniran an mga programang nasa supervision kaini.

Sinabi ni Duhaylungsod na an tolong taon na Municipal Tourism Development Plan nahimo na. Ini an mataong giya sa mga actividades na nakalatag base sa RA 9593 o Tourism Act of 2009.

Katakod kaini, an local na gobyerno an seryosong naggigibong mga esfuerzos tanganing masusteniran an mga pangaipo sa pagparambong kan turismo. Si alkaldesa Polinga an naglalaom na an lado kan turismo ninda an madara nin haraloyan na beneficio sa economia, infrastructura, asin pagsustenir kan malinig na comunidad na an mga residentes bukas puso asin isip sa karahayan kan kagabsan.

Ini kinakabalehan  kan infrastrure enhancement, paz y orden, accommodation and recreational facilities service upgrading, power, water transportation and communications provision asin mga katarakod na servicio. Katuwang kan ehecutivo local iyo an Sangguniang Bayan asin mga Stakeholder hale sa iba-ibang sector.

Segun sa Municipal Tourism Officer, an Siruma dakol na mga tourist destination na comparable sa ibang lugar sa Pilipinas. Soboot, an San Ramon Rolling Hills - Daldagon Peak an kabaeng kan probinsyang Batanes.

Apat na mga barangay - an Poblacion, Homestead, Penitan asin San Ramon (Daldagon) - an makusog an hatak sa mga  dayo.sa banwa.

An banwaan nin Siruma may mga pambihirang mga isla, kadagatan asin baybayon na kinakawilihan kan mga turista. Igua pa man ining mga sobra sa gayon na mangrove forests, multiple marine sanctuaries na parating pigtatampok sa mga on-line vlogs asin ibang media flatforms.

Sarong sadiri asin pigmamanehar kan gobyerno local na tourist destination, an Amuris Resort, an papakarhayon man tanganing magin dagdag na burabod nin revenue kan gobyerno local.

An mala-paraisong “Kiudkud, the Lost Resort” iyo man an natampok sa location shooting kan pelikulang “What If?”ninda Alessandra de Rossi asin JM de Guzman.

Mientrastanto, an Tourism Officer nagpaabot nin imbitasyon sa mga turista na bisitahon an banwaan kan Siruma. Magigin sulit an experiencia ninda kun mahihiling asin mahihimate an pambihirang kagayonan kan banwaan na ini, dagdag niya.

Sarong tourist area sa banwaan nin Siruma, Camarinea Sur na pigdadayo kan mga turista. (Photo LGU Siruma)