Turn out kan nagboto sa Naga maabot sa 75 %

Dawa posibleng maabot sa 75 porciento an turn out sa nagtapos na Barangay, Sangguniang Kabataan Elections (BSKE) kan Oktubre 30 alagad an Commission on Election sa Ciudad nin Naga pigcoconsiderar na halangkaw na an numero kan botantes kan ciudad para sa saindang political exercises.

Sinabi ni Atty. Maico Julia Jr. Election officer sa ciudad nagpahayag na maabot sa 75 porciento an nakaparticipar alagad nagpapadagos pa an saindang ginigibong pagkua kan statistics mantang kabali na digdi si mga jovenes na nag-eedad 15 anyos pataas sa lado kan sangguniang kabataan afuera kan regular na botantes. Kun makumpleto na ninda an ginigibong statistics ipapaluwas an mga detalye.

An ciudad igwang 120 mil na rehistradong botantes sa nagtapos na pirilian asin an 38 mil hali sa SK.

Halangkaw an nagparticipar sa BSKE mantang barangay level an pirilian sagcod si mga pariente na nagtatrabajo hali sa Metro Manila asin iba pang lugar obligado na magpuli nganing iboto ninda afuera kan halawig si mga aldaw nin bakasyon.

Nagpagirumdum an Comelec sa mga naging kandidato kan BSKE na dapat magsumiter kan saindang Statement of Contribution and Expenditures (SOCE) dai na halaton an plaso sa Noviembre 29, 2023.

Mientras tanto sa paglibotlibot kan BM sa ibang mga barangay igwa pang mga candidato dai hinarali o nag-inisyar nganing tanggalon an mga campaign materials na ginamit kan nakaaging eleksyon, apesar na tinawan sinda nin plaso mga ganador o daog dapat haralion an mga poster asin tarpaulin.