UKAY-UKAY AN UNDERWEAR

Tigsik ko ining  fiesta sa banwa

Sagana an tsibugan, sagad an ogma

(Igua pa nganing bitbit an mga bisita!)

Aw pag-abot na tabi kan segunda dia

Tada: hugasan, sagmaw, utang, nganga!

Tigsik ko si Maria Magdalena

Sa may Rodson Hotel nagrampa

Malanit an virus na daradara

Nakaulakit, maraya pa sinda!

Tigsik ko an makuapo ni Rizal

Naghakay sa kayod na matumal

Pagkaaga daeng ontok an hakay

Tolo sanang pandesal an pamahaw!

Tigsik ko si Nikki Feeling Pogi

Adonis an paghiling sa sadiri

Sigeng balawbagaw pagkabanggi

Naghahanap palan nin wampipti!

Tigsik ko an sablok na buwitre

Nakamateng gutom matangang banggi

Naglayog, nagtugpa, nag-atake

Inupakan dawa lapang karne!

Tigsik ko man po ining si Dyesebel

Nagsisid duman sa Regent Hotel

Wilwil an ngabil, tabyon an bilbil

Nawawaan, ukay-ukay an underwear!